काठमाडौँ । राष्ट्रियसभाका अध्यक्ष नारायणप्रसाद दाहालले राष्ट्रियसभाको १९ औँ अधिवेशनले संविधानको मर्मअनुसार आपसी विश्वास पैदा गर्ने र जनतामा पैदा भएको अन्योलतालाई चिर्ने काम गरेको बताएका छन् ।
अधिवेशन अन्त्यका सन्दर्भमा शुक्रबार राष्ट्रियसभा बैठकमा अध्यक्ष दाहालले १९औँ अधिवेशन समयका हिसाबले छोटो अवधि सञ्चालन भए पनि ऐतिहासिक र महत्त्वपूर्ण भूमिका पूरा गर्दै सम्पन्न भएको समेत बताए ।
जेनजी आन्दोलनपछि बदलिएको देशको राजनीतिक परिस्थिति र प्रतिनिधिसभा विघटन भई नयाँ निर्वाचन घोषणा भएको अवस्थामा एक प्रकारको अन्यौलताको बिच राष्ट्रिय सभामार्फत विशिष्ट कामहरू पूरा गरेको उनले बताए ।
उनले कानुनी जटिलतालाई समाधान गर्ने मात्रै नभई सरकार, सङ्घीय संसद्, राजनीतिक दल र अन्य पक्षहरूसँग समेत सहमति, सहकार्य र समन्वय गर्दै संविधानको मर्मअनुसार आपसी विश्वास पैदा गर्ने र जनतामा पैदा भएको अन्योलतालाई चिर्न सफल भएको धारणा राखे ।
१९ औँ अधिवेशनमा ९ वटा बैठक बसी जम्मा १७ घण्टा २५ मिनेट सभाको काममा व्यतीत भएको उनले जानकारी दिए । सरकारको सिफारिसमा राष्ट्रपति रामचन्द्र पौडेलले शुक्रबार राती १२ बजेदेखि लागू हुने गरी राष्ट्रियसभाको १९ औँ अधिवेशन अन्त्य गरेका छन् ।
