काठमाडौँ । देशका विभिन्न जिल्लामा भएका छुट्टाछुट्टै सवारी दुर्घटनामा परी नौ जनाको मृत्यु भएको छ। नयाँ वर्षको सुरुवातमै रुपन्देही, बर्दिया, उदयपुर, सिन्धुपाल्चोक, कैलाली र भक्तपुरमा भएका यी दुर्घटनाले सडक सुरक्षाको गम्भीर अवस्थालाई चित्रण गरेको छ। रुपन्देहीको देवदह नगरपालिका–४ भवानीपुरमा स्कुटर अनियन्त्रित भई पल्टिँदा २२ वर्षीय दिपेश सारुको मृत्यु भएको छ भने तिलोत्तमा–१६ मा भएको मोटरसाइकल दुर्घटनामा १७ वर्षीय सन्तोष थापाले ज्यान गुमाएका छन्।
दुवै दुर्घटनामा घाइते भएका अन्यको स्थानीय अस्पतालमा उपचार भइरहेको छ। बर्दियाको बढैयाताल गाउँपालिका–४ मा गएराति मोटरसाइकल अनियन्त्रित हुँदा २० वर्षीय बिमल थारू र २३ वर्षीय कृष्ण थारूको मृत्यु भएको छ। गम्भीर घाइते उनीहरूको उपचारका क्रममा गुलरिया अस्पतालमा मृत्यु भएको प्रहरीले जनाएको छ।
त्यस्तै, उदयपुरको उदयपुरगढी–७ जोगीटोलमा सिटीसफारी पल्टिँदा ४ वर्षीय बालक सुरज मग्रातीको ज्यान गएको छ। दुर्घटनामा घाइते चालक र अन्य एक यात्रुको विराटनगरका विभिन्न अस्पतालमा उपचार भइरहेको छ। सिन्धुपाल्चोकको बलेफी–८ नयाँपुलमा दुईवटा मोटरसाइकल एकआपसमा ठोक्किँदा २५ वर्षीय जीवन खत्रीको मृत्यु भएको छ। दुर्घटनामा संलग्न अर्का चालकलाई प्रहरीले नियन्त्रणमा लिएको छ।
उता कैलालीको लम्कीचुहा–७ मा हायसले मोटरसाइकललाई ठक्कर दिँदा ३३ वर्षीय गगन राना मगर र २४ वर्षीय पुष्प सुनारको मृत्यु भएको छ। ठक्कर दिने हायस चालकलाई प्रहरीले नियन्त्रणमा लिएर अनुसन्धान अघि बढाएको छ। यसैगरी, भक्तपुरको सानोठिमीमा मोटरसाइकल अनियन्त्रित भई दुर्घटना हुँदा २५ वर्षीय मनिष न्यौपानेको मृत्यु भएको छ। प्रहरीले यी सबै घटनाको सम्बन्धमा थप अनुसन्धान गरिरहेको छ।
