काठमाडौँ : इरानको केशम टापुमा अवैध सामान तस्करी आरोपमा पक्राउ परेका नेपाली अमृत झाको निष्पक्ष सुनुवाइ र रिहाइका लागि निरन्तर कूटनीतिक पहल भइरहेको परराष्ट्र मन्त्रालयले जनाएको छ। हाल उनी इरानको बन्दर अब्बासमा पुर्पक्षका लागि थुनामा छन्।
मन्त्रालयले सोमबार विज्ञप्ति जारी गर्दै झाको अवस्था र उनको रिहाइका सन्दर्भमा सामाजिक सञ्जाल तथा सञ्चारमाध्यममा आएका भ्रामक खबरबारे स्पष्ट पारेको हो।
परराष्ट्रका अनुसार अमेरिका-इजरायल र इरानबीच गत २८ फेब्रुअरी २०२६ मा द्वन्द्व सुरु हुनुअगावै अर्थात् जनवरी २०२६ को सुरुमा झा र अन्य ६ विदेशीलाई इरानी सुरक्षाकर्मीले केशम टापुबाट नियन्त्रणमा लिएका थिए।
प्राप्त पछिल्लो जानकारीअनुसार अदालतले माग गरेबमोजिमको ‘एक्सपर्ट रिपोर्ट’का लागि गठित विज्ञ टोलीले प्रतिवेदन तयार गरी अदालतमा बुझाउने प्रक्रियामा रहेको मन्त्रालयले जनाएको छ।
इरानको स्थानीय अदालतमा विचाराधीन मुद्दाको निरूपण त्यहाँकै कानुनअनुसार हुने भएकाले उपलब्ध सबै माध्यमको प्रयोग गरी झाको निष्पक्ष सुनुवाइ सुनिश्चित गर्न र उनलाई नेपाल फर्काउन कूटनीतिक प्रयास निरन्तर जारी राखिएको परराष्ट्रले जनाएको छ।
