रूपन्देही : अख्तियार दुरुपयोग अनुसन्धान आयोगले मालपोत कार्यालय भैरहवामा कार्यरत नायव सुब्बा ओमबहादुर खाम्चाविरुद्ध घुस/रिसवत लिएको आरोपमा विशेष अदालतमा भ्रष्टाचार मुद्दा दायर गरेको छ।
आयोगले जारी गरेको प्रेस विज्ञप्तिअनुसार खाम्चाले जग्गाको नयाँ स्रेस्ता कायम तथा नामसारी गर्ने प्रयोजनका लागि सेवाग्राहीसँग घुस माग गरेको उजुरीपछि अनुसन्धान अघि बढाइएको थियो।
अख्तियारको कार्यालय बुटवलबाट खटिएको टोलीले उनलाई सेवाग्राहीबाट दुई लाख रुपैयाँ घुस लिइसकेको अवस्थामा उक्त रकमसहित नियन्त्रणमा लिएको जनाएको छ।
अनुसन्धानका क्रममा नायव सुब्बा खाम्चाले जिर्ण स्रेस्ता कायम गर्ने, अपुताली जग्गा नामसारी दाखा गरिदिने लगायतका काम गरिदिएबापत सेवाग्राहीसँग रकम माग गरी मोलमोलाइपछि दुई लाख रुपैयाँ लिएको पुष्टि भएको आयोगको दाबी छ।
आयोगले खाम्चाविरुद्ध विशेष अदालतमा भ्रष्टाचार निवारण ऐन, २०५९ अन्तर्गत मुद्दा दायर गर्दै दुई लाख रुपैयाँ बिगो कायम गरी कैद तथा बराबर जरिवानाको मागदाबी गरेको जनाएको छ।
आयोगका प्रवक्ता सुरेश न्यौपानेद्वारा जारी विज्ञप्तिमा सार्वजनिक सेवा प्रवाहमा हुने भ्रष्टाचार नियन्त्रणका लागि अनुसन्धान र कारबाहीलाई निरन्तरता दिइने उल्लेख गरिएको छ।
