काठमाडौं । उपराष्ट्रपति चयनका लागि आज मतदान हुँदै छ । नयाँ बानेश्वरस्थित संघीय संसद् भवनको ल्होत्से हलमा मतदान हुनेछ । मतदानका लागि बिहान १० देखि दिउँसो ३ बजेसम्मको समय निर्धारण गरिएको छ ।
निर्वाचनमा संघीय संसद् र प्रदेश सभाका सदस्यले मतदान गर्नेछन् । संघीय संसद्का ३३२ र प्रदेश सभाका ५५० मतदाता रहेका छन् तर मतभार भने फरक–फरक हुन्छ । संघीय सांसदको मतभार ७९ र प्रदेश सांसदको मतभार ४८ रहेको छ ।
निर्वाचनको सबै तयारी पूरा भएको निर्वाचन आयोगले जनाएको छ । उपराष्ट्रपति पदमा नेकपा एमालेबाट अष्टलक्ष्मी शाक्य, जनमत पार्टीबाट ममता झा, जनता समाजवादी पार्टी (जसपा) नेपालबाट रामसहायप्रसाद यादव र प्रमिला यादवले उम्मेदवारी दिएका छन् । निर्वाचनको परिणाम आजै साँझ ७ बजेभित्रै सार्वजनिक गर्ने आयोगले जनाएको छ ।
