बैतडीको झौलेक भिरमा जिप दुर्घटना, छ जनाको मृत्यु

बैतडी । बझाङ जोड्ने जयपृथ्वी मार्गको खोड्पे–विन्द्रावन सडक खण्डको झौलेक भिरमा जिप दुर्घटना हुँदा ६ जनाको घटनास्थलमै मृत्यु भएको छ। पाँच जना हाम फालेर बाँच्न सफल भएका छन्।

पाटन नगरपालिका ८, झौलेक गाउँ जाने बाटो नजिक भिरबाट दुर्घटना भएको जिप करिब पाँचसय मिटर तल भिरमा खसेको छ ।

झुलाघाटबाट बझाङको बागथलातर्फ गइरहेको से १ ज ७६४ नम्बरको भण्डारी ट्राभल्स लेखेको जिप राति ११ : ०० बजे दुर्घटना भएको प्रहरीले जनाएको छ । दुर्घटनामा परेर मृत्यु हुनेमा बझाङको केदारस्यु गाउँपालिका ५, का मने बोहरा, गोरख बोहरा, नरे बोहरा ,विर्ख धामी , मानबहादुर धामी , वीरे धामीको मृत्यु भएको छ। मृतक सबै बझाङका हुन्।

जिपको पछाडी सवार ५ जना हाम फालेर बाँच्न सफल भएको प्रहरीको भनाई छ । झौलेक मोड काटेर खोलाको ठाडो घुम्तीको उकालोमा जिप अगाडि बढ्न नसकेर पछाडि धकेलिएको बताईएको छ। जिप पछाडि बसेका पाँच जनाले सडकमै हाम फालेर बाच्न सफल भएको बताएका छन्। प्रहरी घटनास्थलमा पुगेको छ ।