काठमाडौं । नेकपा एमालेको मध्यपहाडी लोकमार्ग केन्द्रित विशेष अभियान अन्तर्गत आज डडेल्धुराको अमरगढीमा सभा हुँदै छ । अभियानको दोस्रो दिन एमालेले डडेल्धुराको अमरगढीमा सभा गर्ने पूर्वनिर्धारित कार्ययोजना छ ।
बिहीबार वैतडीको झुलाघाटमा अध्यक्ष केपी शर्मा ओलीले झन्डा फहराएर अभियानको उद्घाटन गर्नुभएको थियो । पहिलो दिनको सभा बैतडीको गोठालापानीमा गरिएको थियो ।
तेस्रो दिनको सभा मंगलसेनमा हुने एमालेले जनाएको छ । एमालेले पाँचथरको चिवाभञ्ज्याङसम्मको यात्रा सुरु गरेको हो । उसले लोकमार्ग केन्द्रित अभियानलाई ‘समृद्धिका लागि समृद्धिको यात्रा’ नारा दिएको छ ।
एक हजार ८७९ किलोमिटर लामो लोकमार्गको यात्राका क्रममा जनताको गुनासो सुन्ने एमालेले जनाएको छ ।
