काठमाडौँ– कोशी प्रदेश सरकार र पहिचान पक्षधरबिच आज वार्ताको तयारी गरिएको छ । पहिचानसहितको कोशी प्रदेशको पुनः नामाङकन गरिनुपर्ने लगायत माग गर्दै आन्दोलन गरिरहेको समिति आज कोशी प्रदेश सरकारसँग वार्ता गर्न तयार भएको हो ।
प्रदेश सरकार र पहिचान पक्षधरबिचको वार्ता दिउँसो ३ बजेपछि विराटनगरमा हुनेछ ।
केही समयअघि कोशी प्रदेश सरकारले वार्ताका लागि समितिलाई पत्र पठाएको थियो । समितिले हिजो सरकारसँग वार्ता गर्ने निर्णय गरेको थियो । पहिचान पक्षधरहरुले सरकारसँग वार्ताका लागि ११ सदस्यीय समिति गठन गरेको छ । यस्तै माघ ६ गते बसेको मन्त्रिपरिषद्को बैठकले पहिचान पक्षधरसँग वार्ता गर्न भौतिक पूर्वाधार विकास मन्त्री कमलप्रसाद जवेगुको संयोजकत्वमा तीन सदस्यीय वार्ता समिति गठन गरेको थियो । वार्ता समितिको सदस्यमा पर्यटन, वन तथा वातावरण मन्त्री गणेश उप्रेती र सदस्य सचिवमा आन्तरिक मामिला तथा कानुन मन्त्रालयका सचिव लक्ष्मीप्रसाद पौडेल छन् ।
गत फागुन १७ गतेको प्रदेश सभा बैठकले प्रदेशको नाम कोशी पारित गरेपछि पहिचान पक्षले पुनः नामकरणको माग गर्दै विरोध गरिरहेको छ ।
