काठमाडौँ – श्रम संस्कृति पार्टीका अध्यक्ष एवं प्रतिनिधि सभा सदस्य हर्कराज राई (हर्क साम्पाङ) ले प्रधानमन्त्री वालेन्द्र शाहको राजीनामा माग गरेका छन् । विज्ञप्ति जारी गर्दै सांसद राईले प्रधानमन्त्री शाह संसदीय अभ्यासमा गैरजिम्मेवार देखिएको र संसदको अपमान गरेको आरोप लगाउँदै पदत्याग गर्न माग गरेका हुन् ।
विज्ञप्तिमा प्रधानमन्त्री शाहले जेठ २८ गते राष्ट्रपतिले नीति तथा कार्यक्रम प्रस्तुत गरिरहँदा सभा छोडेर बाहिरिएको, जेठ ३० गते छलफलका क्रममा उपस्थित नभएको र नजिकैको कार्यालयमा बसेर संसदको गतिविधि ‘लाइभ’ हेरे पनि सदनमा जवाफ दिन नआएको उल्लेख छ । सांसद राईले प्रधानमन्त्रीका यी कार्यहरूलाई संसदीय परम्पराको बेवास्ता र ‘संसदीय अभ्यासको इतिहासमा कालो धब्बा’ को संज्ञा दिएका छन् ।
“जनताको सार्वभौम सदनलाई अपमान गरेर त्यही संसदबाट चुनिएका प्रधानमन्त्री कुन नैतिकताको आधारमा कुर्सीमा बसिरहेका छन् ?” विज्ञप्तिमा प्रश्न गरिएको छ, “कर्तव्य पूरा गर्न नसक्नेले नैतिकताको आधारमा पदबाट राजीनामा दिएर मार्ग प्रशस्त गर्नुपर्छ ।” साथै, उनले सरकार संसदलाई छलेर अध्यादेशको बाटोबाट हिँड्न खोजेको र न्यूनतम जिम्मेवारी समेत पूरा गर्न नसकेको दाबी गरेका छन् ।
