झापा- स्थानीय तह चुनावको टिकट बाँडफाँटको विषयलाई लिएर झापा कांग्रेसमा असन्तुष्टि बढेको छ । कार्यकर्ताको भावनाअनुसार टिकट वितरण नभएको भन्दै १०० जना भन्दा बढी नेता-कार्यकर्ताले पार्टीबाट राजीनामा दिएका छन् ।
कांग्रेसका नेता एवं महाधिवेशन प्रतिनिधि दयानन्द गोस्वामीसहित सामूहिक राजीनामा दिएका हुन् । गोस्वामी कांग्रेस झापाका पूर्व जिल्ला सचिवसमेत हुन् । कार्यकर्ताको भावनाविपरीत गठबन्धन गरेकाले आफू पार्टीमा रहनुको कुनै तुक नरहेको गोस्वामीको भनाइ छ ।
नेपाली कांग्रेसबाट कन्काई नगरपालिकाको मेयरमा चर्चा भइरहेका शेरबहादुर थापाले पनि पार्टी परित्याग गरेका छन् । उहाँले पार्टीभन्दा व्यक्ति खराब भएको प्रतिक्रिया दिँदै पार्टी छाडेका हुन् ।
२०३७ सालदेखि नेपाली कांग्रेसमा सक्रिय थापाले पार्टीमा लोभीपापीहरू हावी भएको टिप्पणी गर्नु भएको छ।
