काठमाडौँ । एमाले अध्यक्ष तथा प्रधानमन्त्री केपी शर्मा ओलीले विश्वका शक्तिशाली देशहरूले पनि गरिबी निवारण गर्न नसकेको बताएका छन् । आइतबार एमाले पार्टी कार्यालय च्यासलमा आयोजित ‘स्थानीय तहमा पार्टी कामका समस्या र समाधान राष्ट्रिय कार्यशाला’लाई सम्बोधन गर्दै प्रधानमन्त्री ओलीले यस्तो बताएका हुन् ।
उनले भने, ‘अहिलेसम्म विश्वका शक्तिशाली देशहरुले गरिबी निवारण गर्न सकेका छैनन् । सयौँ वर्षदेखि समृद्धि हासिल गरेर दुनियाँमा विकसित भनेर कहलिएका देशहरूले जनताको अवस्था एक हिस्सा गरिबिको अवस्था गरिबीबाट माथि उठाउन सकेका छैनन् । भिममंगा बनाएर छाडेका छन् । भोकै मनुपर्ने अवस्थामा छाडिइदिएका छन् ।’
उनले अल्टिमेटली कम्युनिस्ट पार्टीले मात्र विकास र समृद्धि ल्याउनसक्ने भन्दै चीनको दृष्टान्त दिए । ‘केही पनि नभएको अवस्थाबाट हरेक ठाउँमा प्रतिस्पर्धा गर्दै अघि बढेको छ चीन । चिनियाँ कम्युनिस्ट पार्टी दृष्टान्तबाट सिक्न सकिन्छ’, प्रधानमन्त्री ओलीले कम्युनिस्ट पार्टीले मात्र जनताको सेवा गर्न सक्ने बताए ।
