काठमाडाैँ । संयुक्त राष्ट्रसंंघ सुरक्षा परिषदले शुक्रबार युवावर्ग, शान्ति र सुरक्षा सम्बन्धी प्रस्ताव एकमतपूर्वक पारित गरेको छ । यस प्रस्तावले युवाहरूको शान्ति प्रक्रिया, द्वन्द्व रोकथाम, शान्ति निर्माण, पुनःनिर्माण र उद्धारमा सक्रिय सहभागिता र नेतृत्व बढाउने उपायहरूबारे सबै सम्बन्धित पक्षलाई विचार गर्न आह्वान गरेको छ ।
प्रस्तावले सदस्य राष्ट्रहरूलाई आफ्ना राष्ट्रिय कार्ययोजना युवावर्ग, शान्ति र सुरक्षा सम्बन्धमा अपनाउन वा पहिलेका योजना सुदृढ गर्न प्रोत्साहित गरेको छ । यसले विशेष गरी युवाहरूको नेतृत्वमा हुने शान्ति निर्माण पहलहरूलाई समर्थन गर्न जोड दिएको छ ।
सुरक्षा परिषदले यस प्रस्तावमार्फत युवावर्ग, शान्ति र सुरक्षा एजेन्डालाई आफ्नो कार्यमा निरन्तर विचार गर्ने निर्णय पनि गरेको छ । साथै परिषदले यस विषयमा विशेषज्ञ तहमा छलफल गर्न सदस्य राष्ट्रहरूलाई सुझाव दिएको छ, ताकि युवाहरूको सहभागिता अझ प्रभावकारी र दिगो बन्न सकोस् ।
सुरक्षा परिषदका अधिकारीहरूले युवाहरूको नेतृत्वमा सहभागिता द्वन्द्व र हिंसालाई रोक्न, शान्ति निर्माणमा निरन्तरता राख्न र स्थानीय स्तरमा सामाजिक स्थायित्व कायम गर्न महत्वपूर्ण भूमिका खेल्न सक्ने बताएका छन् । प्रस्ताव पारित भएपछि परिषदले युवासँग सम्बन्धित कार्यक्रम र पहलहरूमा थप निगरानी र सहयोग गर्ने प्रतिबद्धता पनि व्यक्त गरेको छ ।
संयुक्त राष्ट्रले यस प्रस्तावको माध्यमबाट युवाहरूको सशक्तिकरण, शान्ति निर्माणमा उनीहरूको सक्रियता र दीर्घकालीन स्थायित्व कायम राख्ने दिशा स्पष्ट पारेको छ ।
