काठमाडौं । सभामुख डोलप्रसाद (डीपी) अर्यालले जातीय भेदभाव तथा छुवाछूत उन्मूलन राष्ट्रिय दिवसले विभेदमुक्त समाज निर्माणको संकल्पलाई थप बलियो बनाउने विश्वास व्यक्त गरेका छन् ।
बिहीबार आयोजित जातीय भेदभाव तथा छुवाछूत उन्मूलन राष्ट्रिय दिवसको कार्यक्रममा बोल्दै उनले समाजमा अझै पनि जातीय विभेद, छुवाछूत, सामाजिक बहिष्कार, आर्थिक पछौटेपन तथा अवसरबाट वञ्चित हुने अवस्था कायम रहेको बताएका हुन् । उनले नेपालको इतिहासमा यो दिवस सामाजिक विभेदका अन्धकार पक्षहरूलाई चिर्दै समानता र उज्यालोतर्फ उन्मुख हुने महत्वपूर्ण कोसेढुङ्गा भएको उल्लेख गरे ।
उनले भने, ‘आजको दिन नेपालको सामाजिक न्याय, समानता र मानवीय मर्यादाको यात्रामा ऐतिहासिक महत्त्व बोकेको दिन हो । इतिहासको पाना पल्टाउँदा यस लिन विभेद जन्य पक्षहरूलाई चिर्दै उज्यालोतर्फ उन्मुख हुने यात्राको एक कोसेढुङ्गा हो । यो दिवसले हाम्रो समाज अझै पनि जातीय विभेद, छुवाछूत, सामाजिक बहिष्कार, आर्थिक पछैटेन र अवसरबाट बन्चित हुने पीडा व्याप्त छ ।’
उनले दलित समुदायले शताब्दीयौंदेखि भोग्दै आएको पीडा गहिरो र जटिल रहेको उल्लेख गर्दै दिवस इतिहास सम्झिने मात्र नभई बाँकी रहेका विभेद, अन्याय र बहिष्करण अन्त्य गर्ने साझा प्रतिबद्धता दोहोर्याउने अवसर पनि भएको बताए । ‘शताब्दीदेखि दलितले भोग्दै आएको यो पीडा सहन र जटिल छ । आजको दिन इतिहास सम्झने मात्र होइन । अझै बाँकी रहेको विभेद अन्याय र बहिष्करणको अन्त्य गदै अन्त्य गर्ने हाम्रो साझा प्रतिबद्धता दोहोर्याउने दिन समेत हो,’ उनले भने ।
उनले दलित समुदायको सम्मान, सुरक्षा, समान अवसर र न्याय सुनिश्चित गर्न राज्य प्रतिबद्ध रहेको स्पष्ट पार्दै जातीय विभेद तथा छुवाछूतको अन्त्य कुनै एक निकायको जिम्मेवारी मात्र नभएको बताए ।
