नुवाकोट । भक्तजनको चाप बढ्दै गएपछि नुवाकोटको प्रसिद्ध दुप्चेश्वर महादेव मन्दिरमा नियमित पूजा, आरती तथा भक्तजनको प्रवेशलाई थप व्यवस्थित बनाउन नयाँ समय तालिका निर्धारण गरिएको छ।
दुप्चेश्वर क्षेत्र विकास कोषले धार्मिक विद्वान् तथा सामाजिक व्यक्तित्वहरूसँगको छलफल र बैठकको निर्णयअनुसार मन्दिरमा दैनिक पूजा तथा भक्तजनका लागि मुख्य प्रवेशद्वार खुल्ने र बन्द हुने समय निर्धारण गरेको हो।
निर्धारित तालिकाअनुसार असोज १ गतेदेखि फागुन मसान्तसम्म बिहानको नित्य पूजा बिहान ६ः०० देखि ६ः३० बजेसम्म, मध्याह्न पूजा ११ः३० देखि १२ः०० बजेसम्म र साँझको पूजा ४ः३० बजेपछि सञ्चालन हुनेछ। यस अवधिमा भक्तजनका लागि मन्दिरको मुख्य गेट बिहान ६ः३० बजेदेखि साँझ ५:०० बजेसम्म खुला रहनेछ।
त्यस्तै, चैत १ गतेदेखि भदौ मसान्तसम्म बिहानको नित्य पूजा ५ः३० देखि ६ः०० बजेसम्म, मध्याह्न पूजा ११ः३० देखि १२ः०० बजेसम्म र साँझको पूजा ४ः३० बजेपछि सञ्चालन हुनेछ। यो अवधिमा मुख्य गेट बिहान ६ः०० बजेदेखि साँझ ५ः०० बजेसम्म खुला रहने व्यवस्था गरिएको छ।
कोषका अनुसार असोज १ गतेदेखि साँझको आरती सम्पन्न भएपछि मुख्य मन्दिरको गेट बन्द गरिनेछ। तर मन्दिर प्रवेशद्वार (तल्लो गेट) भने हरेक दिन बिहान ४ बजेदेखि खुला रहने व्यवस्था गरिएको छ।
भक्तजनको बढ्दो चापलाई मध्यनजर गर्दै पूजा, आरती र मन्दिर प्रवेशलाई व्यवस्थित तथा सहज बनाउन समय तालिका लागू गरिएको दुप्चेश्वर क्षेत्र विकास कोषले जनाएको छ।
