नेपाली कांग्रेसका महामन्त्री गगन थापाले निर्वाचनमा गठबन्धन गरेर जाने सम्बन्धमा आफ्नो पार्टीमा कुनै निर्णय नभएको बताएका छन् ।
कुडा कर्णाली उत्सवका लागि सुर्खेत पुगेका महामन्त्री थापाले गठबन्धन गरेर निर्वाचनमा जाने निर्णय काँग्रेसले नगरेको बताएका हुन् ।
अहिलेको गठबन्धन विशेष परिस्थितिमा बनेको भन्दै थापाले यही गठबन्धन सरकारले तिनै तहको निर्वाचन बनाउने सन्दर्भमा कुनै अलमल नरहेको बताए । ‘तर, यो गठबन्धन निर्वाचनमा तालमेल गर्ने विषयसँग सम्बन्धित छ,’ उनले भने, ‘यो पटक पनि चुनावमा तालमेल गरेर जाने कि एक्ला-एक्लै लड्ने भन्ने विषयमा बल्ल छलफल सुरु भएको छ ।’
पार्टीभित्र गठबन्धनमा निर्वाचन लड्ने र आफ्नै तागतमा निर्वाचन लड्ने दुईवटा मत रहेको भन्दै महामन्त्री थापाले चैत दोस्रो साताभित्र निर्णय हुने बताए । ‘
अहिले कांग्रेसले चुनावी अभियान सञ्चालन गरिरहेको छ ।
