काठमाडौँ । आईसीसी एकदिवसीय विश्वकप छनोट प्रतियोगिता अन्तर्गत नेपालले आफ्नो दोस्रो खेलमा अमेरिकालाई पराजित गरेको छ । जिम्बावेको ताकशिंगा स्पोट्र्स क्लबमा मंगलबार भएको खेलमा नेपालले अमेरिकालाई ६ विकेटले पराजित गरेको हो । टस हारेर ब्याटिङ गरेको अमेरिकाले नेपाललाई दुई सय आठ रनको विजयी लक्ष्य दिएको थियो ।
जबाफी ब्याटिङ गरेको नेपालले ४३ ओभरमा ४ विकेट गुमाउँदै लक्ष्य पुरा गर्यो । नेपालका लागि भीम सार्कीले सानदार अर्धशतक बनाए । उनले ११४ बलमा ७७ रनको महत्वपूर्ण योगदान गरे । त्यस्तै दीपेन्द्र सिंह ऐरीले ३९ रन बनाए भने कुशल भुर्तेलले ३९ र रोहित पौडेलले १६ रन बनाएका थिए ।
यसअघि ब्याटिङ गरेको अमेरिकाले ४९ ओभरमा अलआउट हुँदै २ सय ७ रन बनाएको थियो । अमेरिकाका लागि सातौं नम्बरका विकेटकिपर शायन जाहांगीरको सानदार शतकमा प्रहार गरेका थिए । शायन जाहांगिरले ७९ बलमा १० चौका र ३ छक्कासहित १ सय रनमा नट आउट रहे । उनको यो अन्तर्राष्ट्रिय करिअरको कुनैपनि खेलको पहिलो शतक हो । उनले ७९ बलमा शतक पूरा गरेका थिए ।
सुशान्त मोदानी ७१ बलमा ३ चौका र १ छक्कासहित ४२ रनमा आउट भए । निसर्ग पटेलले ८ र जेसी सिंहले १२ रनमा आउट भए । नेपालका करण केसीले ९ ओभरमा ३ मेडनसहित ३३ रन खर्चेर सर्वाधिक ४ विकेट लिए । गुलशन झाले १० ओभरमा ५२ रन खर्चेर ३ विकेट लिए । दीपेन्द्रसिंह ऐरीले ५ ओभरमा १५ रन खर्चेर २ विकेट लिए ।
ललित राजवंशीले १० ओभरमा २० रन खर्चेर १ विकेट लिए । सन्दीप लामिछानेले १० ओभरमा ५८ रन खर्चिदा विकेट लिन सकेनन् । सन्दीप पहिलो पटक लगातार दोस्रो ओडिआई खेलमा विकेट विहीन बनेका हुन् । सन्दीपले जिम्बावेविरुद्ध १० ओभरमा ७७ रन खर्चेर विकेट लिन सकेका थिएनन् ।
अब नेपालले विश्वकप छनोट अन्तर्गत समूह चरणको तेस्रो खेल बिहिबार वेस्ट इन्डिज र अन्तिम खेल सनिबार नेदरल्यान्ड्ससँग खेल्नेछ ।
