काठमाडौं । प्रमुख सत्तारुढ नेकपा एमालेले काठमाडौं महानगरपालिकाका मेयर बालेन्द्र साहले विस्तारै संयमता गुमाउँदै गएको जनाएको छ ।
![](https://suchanapress.com/wp-content/uploads/2024/06/yogeshor-768x512.jpg)
मंगलबारको प्रतिनिधिसभा बैठकमा समय लिएर बोल्दै एमाले सचिवसमेत रहेका सांसद योगेशकुमार भट्टराईले मेयर बालेन साले संयमता गुमाउँदै गएको बताए । ‘काठमाडौं महानगरपालिकाका मेयरले संयमता गुमाउँदै हुनुहुन्छ,’ भट्टराईले भने, ‘अघि बढौँ तर, उत्तेजना र उच्छृङ्खलतामार्फत होइन ।’
भट्टराईले आमयुवाहरूले मेयर साहमार्फत आफ्नो भविष्य खोजेको पनि उनले धोका दिएको बताए । ‘गालीगलौज गर्नु, उत्तेजनामा आउनु आवश्यक छैन । आकाशतिर फर्केर थुक्दा त्यो कहाँ झर्छ, थाहा हुनुपर्छ,’ उनले भने ।
साह मेयरमा निर्वाचित हुनेबित्तिकै अध्यक्ष केपी शर्मा ओलीले तबला उपहार दिएको उनले स्मरण गरे । तर मेयर साहले तबलाको अर्थ नबुझेको भट्टराईले बताए । ‘तबलाको अर्थ करुणा, प्रेम, सद्भाव, संयमता हो । तर उहाँले बुझ्नुभएन’, उनले भने ।
भट्टराईले काठमाडौंले ऋषिमुनिहरूले बनाएको र बुद्धले बनाएको सभ्यताको प्रतिनिधित्व गर्ने बताए। त्यसमा धावा बोल्ने कामलाई स्वीकार्न नसकिने उनले बताए । यसअघि सोमबार मेयर साहले ‘१० हजार करोडको काण्ड लुकाउन अर्को काण्ड गरेर जनता नझुक्याउनु होला माननीय केपी ओलीज्यू’ भनेर आक्रोश पोखेका थिए ।
त्यो आक्रोश न्यूरोडमा भत्काइएको सडक पुरिएपछिको थियो । फुटपाथ बढाउन भन्दै महानगरपालिकाले भत्काएको सडक पुरिएपछि साहले त्यसको आक्रोश ओलीमा साँधेका हुन् ।