मन्त्री राणाद्वारा इजरायल र लेवनानमा विकसित अवस्थाबारे राजदूतहरूसँग संवाद

काठमाडौँ । परराष्ट्रमन्त्री आरजु देउवा राणाले इजरायल र लेवनानमा विकसित पछिल्लो परिस्थिति र त्यहाँ रहेका नेपाली नागरिकहरुको अवस्थाका बारेमा सम्बन्धित देशका राजदूतहरुसँग जानकारी लिएकी छन् । मन्त्री राणाले आइतबार इजिप्ट, इजरायल र पाकिस्तानका नेपाली राजदूतहरुसँग जानकारी लिएको सामाजिक सञ्जालमार्फत जानकारी गराएकी छन् ।

उहाँहरुले ती देशमा नेपालीहरु अहिलेसम्म सुरक्षित रहनुभएको र अप्ठेरोमा परेका नेपालीहरुलाई सम्पर्कमा आउन सार्वजनिक सूचनामार्फत् आह्वान गरिएको जानकारी गराउनुभयो’, राजदूतहरुको भनाइ उधृत गर्दै मन्त्री राणाले आवश्यकताअनुसार नेपाली नागरिकहरुलाई सहयोग र समन्वय गर्न तथा उद्धार गरेर स्वदेश ल्याउनुपर्ने अवस्था भए त्यसका लागि समेत आवश्यक गृहकार्य गरी मन्त्रालयलाई निरन्तर जानकारी गराउन भनेको बताएकी छन् ।