बुटवल । ठगी अभियोगमा पक्राउ पुर्जी जारी भएका नीलकण्ठ (राजु) डुम्रेलाई बुटवल प्रहरीले पक्राउ गरेर काठमाडौँ पठाएको छ। रुपन्देहीको सैनामैना नगरपालिका बसोबास गर्दै आएका डुम्रेलाई बुटवल बसपार्कबाट पक्राउ गरेर काठमाडौँ पठाएको हो । इलाका प्रहरी कार्यालय बुटवलका प्रमुख प्रहरी नायव उपरीक्षक विजयराज पण्डितले ठगी आरोपमा पुर्जी जारी भएका डुम्रेलाई पक्राउ गरेर अपराध अनुसन्धान महाशाखामा काठमाडौँ पठाएको बताए।
उनले काठमाडौँ आएको पत्र आधार पक्राउ गरेर अनुसन्धानको लागि उतै पठाएको विस्तृत जनाकारी नभएको बताए । स्रोतका अनुसार वैदेशिक रोजगारीमा पठाइदिन्छु भन्दै विभिन्न व्यक्तिहरूबाट पैसा उठाएर ठगी गरेको उजुरीका आधारमा डुम्रे विरुद्ध ठगी अभियोगमा मुद्दा परेको थियो । उनले रुपन्देहीमा घर जग्गा कारोबार समेत गर्ने गरेका थिए । स्रोत अनुसार उनलाई पक्राउ गर्न प्रहरीले दसैँको बेलामा समेत प्रयास गरेको थियो । तर उनले प्रहरी आएको सुइँको पाएपछि घरबाट त्यो बेला भाग्न सफल भएका थिए ।
