काठमाडौं : भारतीय राज्य उत्तराखण्डको केदारनाथमा रहेको केदारनाथ धाम मन्दिरका ढोका शुक्रबार बिहानदेखि खुला गरिएका छन्।
भारतीय सञ्चारमाध्यमका अनुसार पहिलो दिनमै झन्डै १० हजार जनाले मन्दिर दर्शन गरेका छन्। गंगोत्री र यमुनोत्री धामका ढोकाहरू ३० अप्रिलमा खोलिए र चारधाम यात्रा सुरु भयो। बद्रीनाथ धामका ढोकाहरू भने मे ४ मा खोलिनेछन्।
अब भक्तजनहरूले आगामी ६ महिनासम्म दर्शन गर्न सक्नेछन्। यसपटक २५ लाखभन्दा बढी मानिसले केदारनाथ धाम पुग्ने अपेक्षा गरिएको छ।
केदारनाथ कसरी पुग्ने?
यात्रुहरूले केदारनाथ पुग्न हरिद्वार र ऋषिकेशबाट सिधा बस लिन सक्छन्। बसहरू सोनप्रयागसम्म मात्र जान्छन्। भाडा ६०० देखि ७०० रुपैयाँ छ।
यहाँबाट तपाईंले सानो सवारीसाधन वा पैदल यात्रा गरेर ८ किलोमिटर टाढा रहेको गौरीकुण्ड आउनुपर्नेछ। गौरीकुण्डमा बस्ने र खानाको सुविधा छ। यहाँबाट केदारनाथ धामसम्म २० किलोमिटरको कठिन पदयात्रा सुरु हुन्छ।
