म्याग्दी: जिल्लाको रघुगङ्गा गाउँपालिकामा जलविद्युत् आयोजनाको लगानीमा सडक स्तरोन्नति सुरु भएको छ । रघुगङ्गामा निर्माणाधीन र निर्माणको अन्तिम चरणमा रहेका पाँच जलविद्युत् आयोजनाको लगानीमा सडक स्तरोन्नति थालिएको हो ।
मौवाफाँट हुँदै झिँ, पाखापानी, दग्नाम र चिमखोलासम्मका कठिन भागमा ढलान कार्य भइरहेको गाउँपालिकाका अध्यक्ष भवबहादुर भण्डारीले जानकारी दिए ।
३५.५ मेगावाट चिमखोला–राहुघाट–मङ्गले र २१.३ मेगावाट ठूलोखोला आयोजना सम्पन्न भइसकेका छन् भने राहुघाट, ठूलोखोला ‘ए’ र अपर राहुघाट आयोजना अन्तिम चरणमा छन्। तुँदी पावर, ठूलोखोला र माथिल्लो ठूलोखोला (ए)ले करिब दुई करोड रुपैयाँ सहयोग गरेर सडक ढलान र विस्तार गरेका छन् ।
यस्तै, रघुगङ्गा हाइड्रोपावरले करिब १० करोड रुपैयाँ खर्चेर बेनी–जोमसोम सडकअन्तर्गत घुमाउने ताल–पिप्ले–मौवाफाँट खण्डमा स्तरोन्नति थालेको छ ।
