काठमाडौँ । जेनजी आन्दोलनपछि राजनीतिक परिदृश्यमा आएको फेरबदलमा प्रधानमन्त्रीको दाबी गर्दै आएका धरान उपमहानगरपालिकाका मेयर हर्क साम्पाङले आफूलाई खानेपानी तथा श्रम मन्त्रालय प्रस्ताव गरिएको बताएका छन् । साम्पाङले सामाजिक सञ्जालमार्फत सोमबार एक स्ट्याटस पोस्ट गर्दै खानेपानी तथा श्रम मन्त्रालय प्रस्ताव भएको जानकारी दिएका हुन् । उनले लेखेका छन्, “मैले दाबी गरेको प्रधानमन्त्री, उनीहरूले दिन चाहेको खानेपानी र श्रम मन्त्रालय ! पारा मिलेन ।”
गत भदौ २४ गते जेनजी आन्दोलनले तातिएको बेला एमाले अध्यक्ष केपी शर्मा ओलीको नेतृत्वको सरकार पतन भएपछि साम्पाङले खुलेरै प्रधानमन्त्रीको दाबी गरेका थिए । गत शुक्रबार राष्ट्रपति रामचन्द्र पाैडेलले पूर्वप्रधानन्यायाधीश सुशीला कार्कीलाई प्रधानमन्त्री नियुक्त गरेपछि साम्पाङ धरान पर्किसेका छन् । हाल उनी यस घटनाप्रति सामाजिक सञ्जालमार्फत निरन्तर कडा प्रतिक्रिया दिइरहेका छन् ।
