नवलपरासी । राष्ट्रिय स्वतन्त्र पार्टी (रास्वपा)का सभापति रवि लामिछानेको कार्यक्रमबारे नवलपरासी (बर्दघाट सुस्ता पश्चिम) प्रशासनले सचेत गराएको छ । जिल्ला दौडाहमा रहेका लामिछाने मंगलबार नवलपरासी पश्चिमका विभिन्न ठाउँमा आयोजना गरिएको कार्यक्रममा सहभागी हुने तय गरिएको थियो ।
लामिछाने सहभागी हुने कार्यक्रम निर्वाचन आचारसंहिता विपरीत हुनसक्ने भन्दै प्रशासनले निर्वाचन आचारसंहिता विपरित हुनेगरी कार्यक्रम नगर्न भनेको हो ।
प्रशासनले भनेको छ, ‘प्रतिनिधि सभा सदस्यको आसन्न निर्वाचनलाई स्वतन्त्र, निष्पक्ष, स्वच्छ, पारदर्शी, मितव्ययी तथा भयमुक्त वातावरणमा सम्पन्न गर्न निर्वाचन आयोगद्वारा निर्वाचन आचारसंहिता, २०८२ लागु भई परिपालना सम्बन्धमा मिति २०८२ साल माघ १४ गते सूचना समेत जारी भएको व्यहोरा विदित्तै छ । उपर्युक्त सम्बन्धमा मिति २०८२ साल माघ २७ गते यस जिल्लामा ‘राष्ट्रिय स्वतन्त्र पार्टीका सभापति रवि लामिछानेको जनसम्पर्क तथा घण्टी अभिवादन कार्यक्रम’ रहेको सूचना प्राप्त हुन आएकाले सो सम्बन्धमा निर्वाचन आचारसंहिता, २०८२ आकर्षित हुनेगरी निर्वाचन आचारसंहिता विपरीतका गतिविधि नगर्नु, नगराउनु हुन सम्बन्धित सबैमा जानकारी गराइन्छ ।’
