लन्डन । विश्व बजारमा एल्मुनियमको मूल्य झन्डै चार वर्षयताकै उच्च स्तरमा पुगेको छ । मध्यपूर्वका दुई प्रमुख उत्पादक कम्पनीहरूमा भएको हवाई आक्रमणपछि आपूर्ति प्रभावित हुने चिन्ताले मूल्य उकालो लागेको हो । सोमबार लन्डन मेटल एक्सचेञ्जमा एल्मुनियमको मूल्य ३ प्रतिशतभन्दा बढीले बढेर प्रतिमेट्रिक टन ३ हजार ४०१ अमेरिकी डलर पुगेको छ ।
यो पछिल्ला चार वर्षकै उच्च नजिकको स्तर हो । पश्चिम एसियाको प्रमुख उत्पादक इमिरेट्स ग्लोबल एल्मुनियम (ईजीए)ले आबुधाबीस्थित आफ्नो कारखानामा गम्भीर क्षति पुगेको जनाएको छ ।
त्यस्तै एल्मुनियम बहराइनले पनि आफ्नो प्लान्टमा भएको क्षतिको मूल्याङ्कन गरिरहेको जनाएको छ । एल्मुनियमम इलेक्ट्रोनिक्स, प्याकेजिङ, निर्माण र सवारी साधन निर्माणमा व्यापक रूपमा प्रयोग हुने धातु हो ।
पश्चिम एसियामा जारी द्वन्द्वका कारण यसको आपूर्तिमा अवरोध भयो भने विश्व बजारमा व्यापक असर पार्न सक्छ । यसअघि सन २०२२ मार्चमा रुसले युक्रेनमाथि आक्रमण गरेपछि एल्मुनियमको मूल्य प्रतिटन ४ हजार डलर नाघेको थियो ।
