काठमाडौं। नेकपा (एमाले) का अध्यक्ष केपी शर्मा ओलीले आफू प्रधानमन्त्री हुँदा मुद्दा मामिलाका लागि ५६ हजारवटा हस्ताक्षर गर्नुपरेको बताउनुभएको छ । सोमबार सम्पादकहरुसँगको अन्तरक्रिया कार्यक्रममा भ्रष्टाचार, अनियमितताका विषयमा एमाले न्यायिक बाटोमा जान्छ कि जाँदैन भन्ने प्रश्नको जवाफ दिने क्रममा अध्यक्ष ओलीले एमाले मुद्दा मामिलाप्रति फ्रस्टेट भएको बताउनुभयो ।
उहाँले भन्नुभयो, म प्रधानमन्त्री हुँदा सुर्खेतमा धाराको टुटि बिग्रियो भनेपनि मुद्धा हाल्ने चलन थियो । मुद्धा अध्ययन गर्दा मुद्धा लेख्दा, प्रधानमन्त्री कार्यालयमा ५/७ जना वकिल राख्या छ विहानदेखि त्यही काममा खटिएको छ, लाग्छ प्रधानमन्त्रीको अरु कामै छैन ।
आफू प्रधानमन्त्री हुँदा सानातिना विषयमा प्रधानमन्त्रीलाई विपक्षी बनाएर मुद्दा दायरा हुँदा जवाफ दिँदा दिँदा निकै नै हैरानी खेप्नुपरेको उहाँको गुनासो थियो । सो क्रममा करिब ५६ हजारपटक हस्ताक्षर गरेको र हस्ताक्षर गर्ने क्रममा औँलामा ठेला नै उठेको ओलीले बताउनुभयो ।
‘एउटा मुद्दा कम्तीमा छोटो लेख्दा पनि १० पेजको प्रतिवाद पत्र हुन्थ्यो । एउटा मुद्दा १० पेजको तीनप्रति प्रतिवाद पत्र लेख्नुपर्छ । तीनप्रतिमै प्रधानमन्त्रीले सही गर्नुपर्छ, ३० पेज त भयो । ३० पेजको शिर र पिँधमा सही गर्नुपर्छ । छोटो भयो भने ६० वटामा सही गर्नुपर्छ,’ आफू प्रधानमन्त्री हुँदा सरकारलाई विपक्षी बनाएर दायर भएको रिटको जवाफ दिँदाको अवस्थाबारे जानकारी दिँदै ओलीले भन्नुभयो, ‘मैलै मोटामोटी हिसाब गर्दा ५५/५६ हजार हस्ताक्षर मैले प्रधानमन्त्री हुँदा मुद्दाको मामलामा गर्नुपर्यो, अब त्यो कम्प्युटरबाट पनि गर्न नमिल्ने, हस्ताक्षर गर्दा गर्दा यहाँनिर (हातको औँला देखाउँदै) ठेला उठ्यो । ”
