विराटनगर – मोरङ क्षेत्र नम्बर ६ २ बाट नेकपा एमालेका उम्मेद्वार पर्शुराम बस्नेतले यस क्षेत्रका जनतासँगै आफ्नो भविष्य पनि जोडिएको बताउनु भएको छ । आफू पनि यसै क्षेत्रको बासिन्दा रहेको भन्दै उहाँले यहाँका जनतालाई समस्या हुँदा आफूलाई पनि हुने नेता बस्नेतले बताउनुभयो।
चुनावी अभियानका क्रममा क्षेत्रका जनताको घरदैलोमा पुग्दै नेता बस्नेतले यस क्षेत्रको विकास र यहाँका समस्या समाधानका निम्ति आफू दिनरात जनताकै माझमा रहेर हिड्ने प्रतिबद्धता व्यक्त गर्नुभएको छ ।
विकास निर्माण, सामाजिक समस्या हरेक हिसावले यस क्षेत्रका जनतासँग प्रत्यक्ष आफू जोडिने भएकाले आफ्नो र सन्ततिको भविष्यका लागि पनि इमान्दारितापूर्वक काम गर्ने उहाँले बताउनुभयो ।
यसअघि अन्यत्रका व्यक्ति उम्मेदवार बन्दा यहाँका जनताको भावना बुझ्न नसकेको सर्वत्र गुनासो आइरहेको बेला बस्नेतले भन्नुभयो ‘तपाईंका समस्या समाधान गर्न तपाईंकै क्षेत्रको उम्मेदवारलाई जिताउने दायित्व पनि तपाईंहरु कै हो ।’
दशकौंदेखि यही रहेर जनताका हरेक दुखसुखको साथी बन्दै आएको भन्दै उहाँले आफ्नो क्षेत्रका तमाम समस्याहरुलाई राम्रोसँग बुझेको बस्नेतले बताउनुभयो। जनतालाई झुटो आश्वासन नदिने भन्दै क्षमता र कानूनले दिएसम्मको भूमिका निर्वाह गर्ने प्रतिबद्धता व्यक्त गर्दै उहाँले यस बाहेक तीनै तहको सरकारसँग समन्वय गरी जनताका समस्या समाधानका लागि लाग्ने बताउनु भएको छ ।
