काठमाडौं । नेकपा (एमाले) पर्वत–काठमाडौं सम्पर्क मञ्चद्वारा आयोजित प्रशिक्षण तथा ‘समृद्ध नेपाल, सुखी नेपालीको यात्रामा मिसन ग्रासरुट’ सम्बन्धी कार्यशाला शनिवार राजधानीमा सम्पन्न भएको छ ।
कार्यक्रमका प्रमुख अतिथि पार्टीका उपमहासचिव पृथ्वीसुब्बा गुरुङले देशको विकासका लागि नेकपा (एमाले) को सरकार आवश्यक रहेको वताउँदै त्यसका लागि पार्टीलाई सुदृढ बनाउनुपर्ने वताउनुभयो । देशमा जब एमालेको नेतृत्वमा सरकार गठन हुन्छ, विकासले गति लिने गरेको चर्चा गर्दै उपमहासचिव गुरूङले २०५१ सालमा नेकपा (एमाले) को सरकार बनेपछि विकास, सामाजिक न्याय र सुरक्षा जस्ता विषय राज्यबाट सम्बोधन हुन थालेको स्मरण गर्नुभयो ।
उहाँले विगतमा एमालेको देश र जनताप्रतिको इमानदार भूमिकाले गर्दा पहिलो र दोस्रो शान्तिपूर्ण जनआन्दोलन सफल भएको, एमालेको विशेष पहलमा २०७२ सालमा संविधान जारी हुन सकेको, संविधान जारी गरेवापत व्यहोर्नु परेको भारतीय नाकाबन्दीलाई एमालेले मात्र डटेर सामना र प्रतिकार गरेको चर्चा गर्नुभयो ।
कार्यक्रममा समृद्ध नेपाल सुखी नेपालीको यात्रामा मिसन ग्रासरुट बिषयमा ग्रामीण विकास विज्ञ डा. योगेन्द्र रिजालले प्रस्तुत गर्नुभएको कार्यपत्रमाथि सेवा निवृत्त सहसचिव देवेन्द्र लामिछाने र प्रा. डा. प्रेम शर्माले टिप्पणी गर्नुभएको थियोे ।
कार्यक्रमलाई सम्बोधन गर्दै केन्द्रीय सदस्य एवं एमाले संसदीय दलका प्रमुख सचेतक पदम गिरीले पर्वत–काठमाडौं सम्पर्क मञ्चको कार्य निकै रचनात्मक भएकाले यस्तो खालको राजनीतिक वहस अभ्यासको सराहना गर्नुभयो ।
सम्पर्क समन्वय कमिटीका सचिव इन्द्र भण्डारीले मिसन ग्रासरुटको आवश्यकताबारे प्रकाश पार्दै यसमा राजनीतिक वहसमा विकास तथा योजना जोडेर कार्यक्रम गर्ने सम्पर्क मञ्चको कार्य प्रसंशनीय रहेको वताउनुभयो ।
