कञ्चनपुर, २७ असोज । शुक्लाफाँटा राष्ट्रिय निकुञ्जमा जङ्गल सफारी खुला गरिएको छ । निकुञ्ज प्रशासनले सोमबारदेखि पर्यटकका लागि शुक्लाफाँटामा जङ्गल सफारी खुला गरेको हो । वर्षाले बाटो बिग्रिएपछि गत असारमा बन्द भएको निकुञ्ज सफारी यस वर्ष ढिलो गरी खुला गरिएको निकुञ्जका सूचना अधिकारी पुरुषोत्तम वाग्लेले जानकारी दिए ।
“वर्षाले ब्रिगेको बाटो र पुल मर्मत् गर्नुपर्ने भएकाले निकुञ्जमा सफारी हुन सकेको थिएन”, उनले भने, “अहिले पनि मर्मत कार्य भइरहेको छ । तोकिएको रुटमा मात्रै सफारी खुला गरिएको हो ।” उहाँका अनुसार अहिले निकुञ्ज सफारीका लागि दुई रुट मात्रै खुला गरिएको छ । अन्य रुटमा मर्मत कार्य चलिरहेकोले पर्यटकले मझगाउँ बठनिया ताल–बाबा ताल दुधिया क्याम्प रानी ताल हुँदै सिंहपुरसम्म पुगि सोही रुटबाट फिर्ता हुनुपर्ने छ ।
त्यसैगरी, मझगाउँ पलियाफाँटा–हात्तिसार चोक बर्कोला पोष्टसम्म पुगि सोही रुटबाट फिर्ता हुने गरी निकुञ्ज सफारी खुला गरिएको निकुञ्ज प्रशासनले जनाएको छ । विगतका वर्षमा असोज १ गतेदेखि निकुञ्ज सफारी खुला गरिने भएपनि यस पटक वर्षाले निकुञ्जभित्रका पर्यटक पथ विग्रेका कारण ढिलो गरी सफारी सुरु भएको हो । तीन सय ५ वर्गकिलोमिटर क्षेत्रफलमा फैलिएको शुक्लाफाँटा राष्ट्रिय निकुञ्ज बाह्रसिँगाका लागि प्रसिद्ध मानिन्छ । निकुञ्जमा दुई हजार ३२३ बढी बाह्रसिँगा छन् ।
शुक्लाफाँटा राष्ट्रिय निकुञ्जभित्रका ताल र नदी आसपासमा विभिन्न प्रजातिका चराचुरङ्गी देख्न पाइन्छ । वन्यजन्तु मात्रै नभई दुर्लभ वनस्पतिका लागि पनि शुक्लाफाँटा प्रसिद्ध छ । निकुञ्जमा ५६ प्रजातिका घस्रने वन्यजन्तु रहेका छन भने १५ प्रजातिका उभयचर, ८८ प्रजातिका माछा, १११ प्रजातिका पुतली, ४६१ प्रजातिका चरा र ५६ प्रजातिका स्तनधारी वन्यजन्तु रहेको निकुञ्ज कार्यालयले जनाएको छ । विश्वमै दुर्लभ मानिएको सारस, खरमजुर, सिमतित्रा, राजधेश र लेसर भुडीफोर जस्ता वन्यजन्तु पनि निकुञ्जमा छन् । जसमा पाटेबाघ, एकसिङ्घे गैँडा, हात्ती बाह्रसिँगा, कृष्णसार, सालक, निलगाई, चितुवा, चितल, लगुना, रतुवा, हिसपीड खरायो, बदेललगायत रहेका छन् ।
