काठमाडौँ : चार महिनाअघि छुटेका रेशम चौधरी र रञ्जिता श्रेष्ठले नेतृत्व गरेको पार्टीबीच शनिबार एकता हुने भएको छ ।
शनिबार दिउँसो १ बजे सिनामंगलस्थित नाउपा नेपाल कार्यालयमा पार्टी एकताको घोषणा हुनेछ । रेशम जेलमा रहेका बेला रञ्जिताको अध्यक्षतामा २०७८ पुसमा नागरिक उन्मुक्ति पार्टी गठन भएको थियो। पार्टीले स्थानीय तह, प्रदेश र प्रतिनिधि सभामा छोटो समयमै राम्रो नतिजा ल्याएको थियो। तर दम्पतीबीचको विवादका कारण पार्टी केही समय सुस्त बनेको थियो।
टिकापुरमा भएको पहिलो महाधिवेशनपछि रञ्जितालाई हटाउँदै रेशम अध्यक्ष भएपछि विवाद उत्कर्षमा पुगेको थियो। त्यसको करिब दुई वर्षपछि भदौ २९ गते रेशमले नाउपाबाट अलग भएर नाउपा नेपाल दर्ता गरेका थिए।
श्रेष्ठका अनुसार, भोलि हुने एकता तयारी पूरा भइसकेको छ। एकताको पछि पार्टीको नाम, झण्डा र चुनाव चिह्न नाउपा नेपालले नै प्रयोग गर्नेछ।
