काठमाडौँ । नेपाली कांग्रेसले संसदीय दलको नेता नयाँ वर्ष लागेपछि मात्रै चयन गर्ने भएको छ । कांग्रेसमा दलको नेता चयनका लागि पार्टीले निर्वाचन समिति बनाउने व्यवस्था छ । त्यही व्यवस्था अनुसार सभापति गगन थापाले सहमहामन्त्री प्रकाश स्नेही रसाइलीको नेतृत्वमा दलको नेता चयनका लागि निर्वाचन समिति बनाएका छन् । समितिमा केन्द्रीय सदस्य मुना भुसाल र अधिवक्ता राजु कटुवाल सदस्य छन् । त्यो निर्वाचन समितिले नयाँ वर्ष २०८३ लागेपछि मात्रै दलको नेता चयन गर्ने बताएको हो । निर्वाचन समितिका संयोजक सहमहामन्त्री रसाइलीले दलको नेता नयाँ वर्ष लागेपछि मात्रै चयन गर्ने तयारीमा आफूहरू रहेको जानकारी दिए । ‘पार्टीले दलको नेता चयन गर्ने जिम्मेवारी दिएको छ । नयाँ साल लागेपछि दलको नेता चयन गर्ने तयारी हाम्रो छ,’ संयोजक रसाइलीले भने ।
गत फागुन २१ गते सम्पन्न प्रतिनिधि सभा निर्वाचनमा अप्रत्यासित हार व्यहोरेको कांग्रेसले प्रत्यक्षतर्फ १८ र समानुपातिकतर्फ २० गरी ३८ सिट जितेको छ । पार्टीको हैसियत प्रतिनिधि सभामा खुम्चिए पनि प्रमुख प्रतिपक्षी दलको हैसियत प्राप्त गरेकाले दलको नेतामा आकांक्षा धेरै सांसदले राखेका छन् । प्रमुख प्रतिपक्षी दलको नेता संवैधानिक परिषद्को सदस्य पनि हुने भएकाले पनि धेरैले आकांक्षा राखेका हुन् । अहिलेसम्म सांसदहरू भीष्मराज आङ्देम्बे, अर्जुननरसिंह केसी, मोहन आचार्य, भरत खड्कासहितले दलको नेतामा आकांक्षा राखेको नेताहरू बताउँछन् । केसी र आङदेम्बेले त सार्वजनिक रूपमै दलको नेतामा दाबी स्वभाविक भएको बताएका छन् ।
गत पुसमा तत्कालिन सभापति शेरबहादुर देउवा र डा. शेखर कोइराला समूहको असहमतिबीच महामन्त्री गगन थापा र विश्वप्रकाश शर्माले विशेष महाधिवेशन गरेपछि कांग्रेसमा विवाद छ । अहिले कांग्रेसमा विशेष महाधिवेशन पक्षधर र त्यसको विपक्षमा रहेको समूह गरी दुई समूह छन् । नेताहरूका अनुसार केसी विशेष महाधिवेशन पक्षधरको तर्फबाट र त्यसको विपक्षमा रहेको समूहबाट आङ्देम्बे बलियो उम्मेदवारका रूपमा देखिएका छन् ।
तर, निर्वाचन समितिले भने सहमतिमा दलको नेता चयन गर्ने प्रयास गरिरहेको देखिन्छ । संयोजक रसाइलीले पहिलो प्रयास सहमतिका लागि हुने जानकारी दिए । सांसदहरूका अनुसार सहमतिका लागि नेताहरूले अनौपचारिक छलफलसमेत सुरु गरेका छन् । आकांक्षीहरूमध्य प्रमुख सचेतक, उपनेता र प्रमुख प्रतिपक्षी दलले पाउने प्रतिनिधि सभाको सार्वजनिक लेखा समिति सभापति बनाउने आश्वासन दिएर भए पनि मिलाउने प्रयास जारी रहेको एक पदाधिकारीले जानकारी दिए ।
