काठमाडौं । अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङबीच चीनको सेन्जेनमा भएको द्विपक्षीय भेटवार्ता सम्पन्न भएको छ। एसिया प्रशान्त आर्थिक सहयोग (एपेक) शिखर सम्मेलनका क्रममा भएको भेटवार्तालाई अमेरिका–चीन सम्बन्ध सुधारका दृष्टिले महत्त्वपूर्ण रूपमा हेरिएको छ।
चिनियाँ सरकारी सञ्चारमाध्यम सीसीटीभीले दुई राष्ट्रपतिबीचको बैठक सकिएको पुष्टि गरेको छ। यद्यपि, छलफलका क्रममा भएका सहमति र निष्कर्षबारे विस्तृत विवरण सार्वजनिक भइसकेको छैन।
अन्तर्राष्ट्रिय सञ्चारमाध्यमका अनुसार भेटवार्तामा दुई देशबीचको व्यापारिक तनाव, दुर्लभ खनिज (रेयर अर्थ) को निर्यात, अत्याधुनिक सेमिकन्डक्टर प्रविधिमा लगाइएका प्रतिबन्ध तथा आर्थिक सहकार्यका विषयले प्राथमिकता पाउने अपेक्षा गरिएको थियो। यसअघि दुवै देशबीच कायम भएको व्यापारिक सहमतिको निरन्तरता पनि छलफलको महत्त्वपूर्ण विषय बनेको छ।
दुई नेताबीचको भेटपछि अब अमेरिकी राष्ट्रपति ट्रम्प, चिनियाँ राष्ट्रपति सी र रुसी राष्ट्रपति भ्लादिमिर पुटिनबीच हुने त्रिपक्षीय बैठकलाई अन्तर्राष्ट्रिय समुदायले चासोका साथ हेरेको छ। विश्वका तीन प्रमुख आणविक शक्ति सम्पन्न राष्ट्रका नेताहरू एकै ठाउँमा बसेर छलफल गर्न लागेकाले यो भेटलाई ऐतिहासिक कूटनीतिक घटनाका रूपमा समेत लिइएको छ।
त्रिपक्षीय वार्तामा आणविक हतियारको नियन्त्रण तथा कटौती, इरानसँग जोडिएको युद्ध र रुस–युक्रेन द्वन्द्वलगायत अन्तर्राष्ट्रिय सुरक्षा चुनौतीबारे छलफल हुने अपेक्षा गरिएको छ। विशेषगरी आणविक हतियारको संख्या घटाउने विषयलाई ट्रम्पले प्राथमिकतामा राख्दै आएका छन्।
तर आणविक हतियार नियन्त्रणसम्बन्धी वार्तामा चीनलाई सहभागी गराउने विषयमा बेइजिङको आफ्नै धारणा रहेकाले तीन देशबीच सहमति जुटाउन सहज नहुने विश्लेषण गरिएको छ।


