धनगढी । कैलालीको गोदावरी जंगलबाट पहिचान नखुलेका भारतीय नागरिकको एक समूहले चालकलाई बाँधेर लुटेको कार फेला परेको छ । प्रहरीले गोदावरी–१ स्थित पाठक आयल स्टोरदेखि शान्तिनगर जाने भित्री सडकखण्डमा कारलाई बेवारिसे अवस्थामा फेला पारेको जिल्ला प्रहरी कार्यालय कैलाली प्रहरी नायव उपरीक्षक वेदप्रकाश जोशीले जानकारी दिए ।
उनकाअनुसार कारको अवस्था ठिक छ । तर, लुटेराहरू फरार नै छन् । उनीहरूको खोजीकार्य भइरहेको प्रहरीले जनाएको छ ।
आज दिउँसो जिल्लाको गोदावरी नगरपालिका-४ स्थित बुढीतोलाबाट डडेलधुरा स्थित आलिताल गाउँपालिकाका कम्प्युटर अपरेटर लोकेन्द्रसिंह भण्डारीलाई निर्घात कुटपिट गरी उनको प्रदेश ०१–२३–च ६०२१ नम्बरको कार लुटिएको थियो ।
महेन्द्रनगरबाट लिफ्ट मागेर आएका ३ जनाले गोदावरी ५ मा आइपुगेपछि निर्घात कुटपिट गरी बाँधेर छोडेका थिए । प्रहरीले उनीहरूको खोजी भइरहेको जनाएको छ ।
