काठमाडौं । काभा महिला भलिबल च्यालेन्ज कप अन्तर्गत समूह चरणको आफ्नो अन्तिम खेलमा नेपाल टिम भारतसँग पराजित भएको छ ।
यसअघि नै दुबै टोलीले सेमिफाइनल पुगिसकेका यो खेलको नतिजाले समूह ए को विजेताको टुंगो लगाएको छ ।
फाइनल प्रवेशका लागि दोस्रो सेमिफाइनल नेपालले काजाकस्तानसँग प्रतिस्पर्धा गर्नुपर्ने भएको छ। नेपाल र काजाकस्तानबीचको खेल शुक्रबार हुने छ ।
आजै भएको समूह बी अन्तर्गत अन्तिम खेलमा उज्वेकिस्तानलाई ३–१ को सेटमा हराएर काजाकस्तान समूह विजेता बनेको थियो ।
सुरुका दुई सेट क्रमसः २५–१२ र २६–२४ ले गुमाएको नेपालले तेस्रो सेट २५–२१ ले जितेर खेलमा फर्किने प्रयास गरेको थियो ।
चौथो सेटको आधा समयसम्म प्रतिस्पर्धात्मक भए पनि एक समय नेपालले १८–१५ को अग्रता बनाएर आशा जगाएको थियो ।
तर, त्यसपछि नेपालले ३ अंकमात्र जोड्दा भारतले १० अंक जोडेर जित हाँसिल गर्न सफल भयो ।
