काठमाडौं । नेकपा एमालेका महासचिव शंकर पोखरेलले सरकार चलाउनेहरू नालायक भए भन्दैमा एमाले सामाजिक अराजकता टुलुटुलु हेरेर बस्न नसक्ने बताएका छन् ।
शनिवार केन्द्रीय कार्यालयमा आयोजित जनसंगठन पदाधिकारीहरूको विशेष भेलालाई सम्बोधनका क्रममा उनले यस्तो बताएका हुन्
।
महासचिव पोखरेलले भने, ‘हामी सत्तामा छैनौँ त्यसैले केही वास्ता छैन भनेर बस्न मिल्छ? यो सरकार नालायक भयो भन्दैमा एमाले गैर जिम्मेवार बन्न सक्छ ? समाजलाई सही बाटोमा हिँडाउने दायित्व राज्यसत्ताको हो भनेर हामी उदासीन बन्न सक्दैनौँ । शासकहरूका कर्मले फैलिएको निराशा र अराजकतालाई चिर्नका लागि कोही न कोही त अगाडि आउनुपर्छ । त्यो कोही न कोही भनेका एमालेका युवा विद्यार्थी हुन् ।
महासचिव पोखरेलले सरकार चलाउनेहरूको कमजोरी र उदासीनताका कारण मुलुक धेरै खाले अराजकता र साम्प्रदायिक विद्वेषतर्फ गइरहेको भन्दै एमाले यस्तो अवस्थामा चुप लाग्न नसक्ने बताए ।
अहिले मुलुकमा एमाले र नेपाली सेना दुई वटा शक्तिमाथि आक्रमण भइरहेको भन्दै यी दुई शक्तिलाई कमजोर पार्दा नेपाल राष्ट्र कमजोर हुने भएकाले यी घटना बढिरहेको पोखरेलले बताए ।
