विराटनगर । प्रहरीले एक करोड ८२ लाख ५१ हजार नक्कली नोट सहित भारतीय नम्बर प्लेटको स्करपियो बरामद गरेको छ ।
सुनसरीबाट उक्त नक्कली नोट सहितको स्कारपियो बरामद गरिएको हो ।
आइतबार भारतीय गाडीमा राखेर ल्याउँदै गरेको अवस्थामा इनरुवा नगरपालिका–४ स्थित सुनसरी खोलाको पुलनजिकबाट उक्त नक्कली नोट बरामद गरिएको सुनसरीका प्रहरी उपरीक्षक (एसपी) विपिन रेग्मीले जानकारी दिए ।
उनका अनुसार नक्कली नोटसँगै एक जना भारतीय नागरिक पनि पक्राउ परेको छन् । सवारीसाधन चेकजाँचमा खटिएको ट्राफिक प्रहरीको टोलीले बीआर ११ एक्स ३४२९ नम्बरको शंकास्पद अवस्थाको स्कोरपियो गाडीमा खानतलासी गर्दा पछाडिको भागमा लुकाइछिपाइ ल्याइएको उक्त नक्कली नोटहरु बरामद भएको प्रहरीले जनाएको छ ।
बोराभित्र झोलामा राखेर ल्याइएको अवस्थामा नक्कली नोट फेला परेको र गाडी चालक भारत वीरपुरका २२ वर्षीय मोहमद सैयद पनि पक्राउ परेका प्रहरीले जनाएको छ । गाडीमा सवार अर्का व्यक्ति भने फरार रहेका र गाडी भारतबाटै आएको प्रहरीले जनाएको छ ।
