काठमाडौं । पुनर्गठित मन्त्रिपरिषद्को पहिलो बैठक बसेको छ । प्रधानमन्त्री तथा मन्त्रिपरिषद्को कार्यालयमा बसेको मन्त्रिपरिषद् बैठकले विभिन्न निर्णय गरेको हो।
बैठकले महिलासम्बन्धी संघीय राष्ट्र संघको कार्यक्रममा महिला बालबालिका तथा ज्येष्ठ नागरिक मन्त्री भगवती चौधरी सहभागी हुने निर्णय गरेको छ । जसअनुसार उनी commission on the status of women (CSW) को ६८ औं सत्रमा भाग लिन अमेरिकाको न्युयोर्क जाने छिन् । यसअघि उक्त कार्यक्रममा तत्कालीन मन्त्री सुरेन्द्रराज आचार्य जाने तयारी गरेका थिए । तर, सत्ता गठबन्धनमा उलटफेर आएपछि उनी रोकिए ।
यस्तै बैठकले सञ्चार तथा सूचना प्रविधिमन्त्री रेखा शर्मालाई नै नेपाल सरकारको प्रवक्तामा निरन्तरता दिने निर्णय गरेको छ । मन्त्री शर्मा यसअघि पनि सरकारको प्रवक्ताका रूपमा थिइन् । अवकाशमा जान लागेकी स्वास्थ्य सचिव देव कुमारी गुरागाईको विदाई गर्ने निर्णय पनि भएको छ। उनी शनिबार अवकास हुन लागेकाले त्यसअघि नै बिदाइ गर्नेगरी निर्णय भएको छ।
