अछाम । अछामको मेल्लेख गाउँपालिकामा आज बिहान भएको ट्र्याक्टर दुर्घटनामा मृत्यु हुने पाँचै जनाको पहिचान खुलेको छ ।
मृत्यु हुनेमा मेल्लेख–१ का ५५ वर्षीय रंग धामी, १५ वर्षीय जनक धामी, ४५ वर्षीय प्रेम धामी, ३७ वर्षीय नरबहादुर धामी र २१ वर्षीय जनक धामी रहेका जिल्ला प्रहरी कार्यालयका सूचना अधिकारी प्रहरी निरीक्षक अर्जुन साउदले जानकारी दिए ।
षोडशाबाट साँफेबगरतर्फ आउँदै गरेको ०१००२ त ४९७९ नम्बरको ट्र्याक्टर मेल्लेख–७ नन्देगडाको सुयडी नजिकै आज दुर्घटना भएको हो । दुर्घटनामा ४२ वर्षीय लालबहादुर धामी, ४० वर्षीय हंस धामी र १५ वर्षीय देवेन्द्र धामी घाइते भएका प्रहरी निरीक्षक साउदले बताए ।
घाइते तीनैजनालाई उपचारका लागि बयलपाटा अस्पताल लगिएको अछाम प्रहरीले जनाएको छ ।
