नयाँ दिल्ली । बलिउड अभिनेता सैफ अली खान पाँच दिनसम्मको उपचारपछि मंगलबार लीलावती अस्पतालबाट डिस्चार्ज भएका छन् । अस्पतालबाट उनी आक्रमण भएको घरमा नगएर अर्कै घर गए । अभिनेता घर फर्केपछि सुरक्षा व्यवस्था कडा पारिएको थियो ।
यस घटनामा अभिनेताको बयान रेकर्ड गर्न बुधवार मुम्बई प्रहरी अभिनेताको घरमा पुगेको छ । यस क्रममा, एउटा भिडियो पनि सार्वजनिक भएको छ जसमा प्रहरी सैफको भवनमा प्रवेश गरिरहेको देखिन्छ । यस अघि प्रहरीले आक्रमणकारीको मनसायबारे धेरै खुलासा गरेको थियो ।
सैफको साथमा किन थिए रोनित रोय ?
यसैबिच, मंगलबार अस्पतालबाट घर फर्किँदा सैफसँगै अभिनेता रोनित रोय पनि देखिए । सैफको साथमा रोनित देखिएपछि धेरैले चासो व्यक्त गरेका थिए । प्रहरी अधिकारीहरूसँग समन्वय गर्दै रोनितले सैफ र करीना कपूरको घरमा सुरक्षा व्यवस्थाको रेखदेख गरिरहेको देखिएका थिए । हमलापछि सैफ अली खानले सुरक्षा एजेन्सी फेरेको र रोनित रोयको सुरक्षा कम्पनी ‘एस सेक्युरिटी’लाई सुरक्षाको जिम्मा दिएको थाहा भएको छ ।
