भक्तपुर – नेकपा एमालेबाट सूर्यविनायक नगरपालिकाका मेयर, उपमेयर पदका उम्मेदवारलाई आजभोलि भ्याइनभ्याइ छ । सूर्यविनायक नगरपालिकाका १० वटै वडाका मतदातालाई लक्षित गरेर भोट माग्न उहाँहरुले समय निर्धारण गरेर घरदैलो अभियान चलाउनुभएको छ । यसै सन्दर्भमा आज सूर्यविनायक नगरपालिकाको वडा नम्बर ३ को नयाँ बस्तीमा घरदैलो अभियान सम्पन्न भएको छ । नयाँ बस्तीको पन्चायन मन्दिरबाट शुरुभएको अभियान, नयाँ पुलहुँदै गणेशप्रावि, तीन र चार वडाका सिमाना र कृष्णमन्दिरमा घरदैलो अभियान चलाइएको थियो ।
घरदैलो अभियानमा नेकपा एमालेका पोलिटव्युरो सदस्य, पूर्वमन्त्री तथा प्रतिनिधिसभाका सांसद महेश बस्नेत, प्रदेश सांसद शसी थापा, जिल्ला अध्यक्ष वचन देउजा, मेयर पदका उम्मेदवार बासुदेव थापा, उपमेयरका उम्मेदवार सरिता भटटराई, वडाका अध्यक्ष, सदस्यका उमेदवार, जिल्ला कमिटिका सदस्यहरु, नगरकमिटिका सदस्य र स्थानीय नेता कार्यकर्ताको बाक्लो सहभागिता रहेको थियो ।
