पाल्पा- सिद्धार्थ राजमार्ग अन्तर्गत तानसेन बुटवल सडक खण्डमा जीप दुर्घटना हुँदा एकजनाको मृत्यु भएको छ । दुर्घटना परी दुई जना घाइते भएका छन् ।
हिजो बेलुका भएको दुर्घटनामा रामपुर नगरपालिका वडा नं. ३, का ४२ वर्षीय सूर्यप्रसाद श्रेष्ठको घटनास्थलमै मृत्यु भएको प्रहरीले जनाएको छ ।
जिल्ला प्रहरी कार्यालय पाल्पाका सूचना अधिकारी बिरेन्द्र थापाले दिएको जानकारी अनुसार बुटवलबाट पाल्पाको रामपुरतर्फ जादै गरेको लु १ च ७७८० नम्बरको बलेरो जीपका चालक निस्दी गाउँपालिका वडा नं.४, का २७ वर्षीय खेमबहादुर खाम्चा र रामपुर नगरपालिका वडा नं.३, का ४६ वर्षीय टुकनारायण श्रेष्ठ घाइते भएका छन् ।
घाइते दुवैको तानसेनस्थित लुम्बिनी मेडिकल कलेज प्रभासमा उपचार भइरहेको प्रहरीले जनाएको छ । घाइतेमध्ये श्रेष्ठको अवस्था गम्भीर रहेको प्रहरीले जनाएको छ । जीप सडकदेखि तीन सय मिटर तल खोलामा खसेको र दुर्घटनाबारे थप अनुसन्धान जारी रहेको प्रहरीले जनाएको छ ।
