काठमाडौँ । नेपाल अन्तर्राष्ट्रिय कृष्णभावनामृत संघ (इस्कोन)को नाम, ख्याति तथा बौद्धिक सम्पत्ति (ट्रेडमार्क) दुरुपयोग गरी मोरङ, सुनसरी, झापा, सिरहा, नवलपरासी पश्चिमलगायतका जिल्लाहरूमा संघ–संस्थाहरू सञ्चालन गरिरहेको आरोपमा ५ जनालाई संस्थाबाट निष्कासित गरिएको छ ।
संस्थाका पूर्व पदाधिकारीहरू तथा सदस्यहरू वसन्त पराख गुरुङ (भक्तिसिद्धान्त दास), विनिश यादव (विपिन विहारी दास), शैलेन्द्र यादव (सिद्धस्वरूप दास), मनिष राई (मनः शिक्षा दास) र खगेन्द्र बहादुर बस्नेत (खगराज अच्युत दास)लाई आपराधिक विश्वासघात एवं ठगीको आरोपमा संस्थाबाट निष्कासित गरिएको इस्कोनको प्रेस विज्ञप्तिमा उल्लेख छ । गृह मन्त्रालय, जिल्ला प्रशासन कार्यालय, मोरङ, उद्योग विभाग, त्रिपुरेश्वर र विराटनगर उच्च अदालतको आदेशानुसार त्यस्तो किसिमको गैरकानूनी कार्य गर्न–गराउन निषेधित गरेको आज्ञालाई उनीहरूको समूहले अवज्ञा गरेको थियो ।
वसन्त पारख गुरुङको अध्यक्षतामा दर्ता भएको इस्कोन प्रभुपादका सदस्यहरुले इस्कोन नेपालका केन्द्रीय कार्यसमितिका सदस्यहरूमाथि विराटनगरमा हातपात समेत गरेका थिए। उनीहरूलाई नक्कली रसिद छपाएर दान सङ्कलन गर्नुका साथै जिन्सी समेत हिनामिना गरेको आरोप छ। उनीहरूमाथि लागेको मुद्दा अदालतमा विचाराधीन रहेको इस्कोन नेपालले जनाएको छ। गुरुङले भने आफूहरू संस्थाको लोगो परिवर्तन गर्न तयारी थालेको साथै यस विषयमा आफूहरूले मौन धारण गर्नुपरेको जानकारी गराए।
