वासिङ्टन डीसी । अमेरिकी खर्बपति व्यापारी एलन मस्कको विद्युतीय कार निर्माता कम्पनी टेस्ला कारहरूमा आगजनी र तोडफोड गरेको आरोपमा प्रहरीले लस भेगासबाट एक व्यक्तिलाई पक्राउ गरेको छ । aअभियुक्तको पहिचान ३६ वर्षका पल हेओन किमको रूपमा गरिएको छ । अभियुक्तले टेस्लाका कारहरूमाथि गोली पनि चलाएका थिए । यसको साथै टेस्लाको शोरूमको सिसामा जातिवादी भनेर लेखेका थिए ।
अभियुक्त युवकले मार्च १८ मा टेस्लाको सेवा केन्द्रमा आक्रमण गरेको बताइएको छ । यसका कारण उनी विरुद्ध राज्य र सङ्घीय अदालत दुवैमा मुद्दा चलाइएको छ । उनलाई बिहीबार सङ्घीय सरकारले हिरासतमा लिएको थियो । किममाथि आगजनी, विस्फोटक पदार्थ राखेको र गाडीमा गोली चलाएको आरोप लगाइएको छ । अवैध हतियार राखेको आरोप पनि उनीमाथि छ । अभियुक्तलाई शुक्रवार लास भेगासको सङ्घीय अदालतमा पेस गरिनेछ ।
अभियुक्तले कारमा पेट्रोल बम र अन्य ज्वलनशील पदार्थहरू फ्याँकेको बताएको अभियोजन पक्षले बताएको छ । टेस्ला कार र शोरूमहरूमा हालैका दिनमा भइरहेका आक्रमणका अन्य घटनाहरूमा अभियुक्त संलग्न छन् कि छैनन् भन्ने बारेमा पनि प्रहरीले अनुसन्धान गरिरहेको छ । मस्कले डोनाल्ड ट्रम्पको प्रशासनमा सरकारी दक्षता विभाग (डज) को जिम्मेवारी लिएर सङ्घीय सरकारको खर्च र कर्मचारी धमाधम कटौती गर्न थालेदेखि नै अमेरिकाभरमा टेस्लाका कारलाई लक्षित गरेर आक्रमण भइरहेका छन् ।
