गोरखा- गोरखा भूकम्पको ‘इपिसेन्टर’ गोरखाको बारपाक गाउँ वीरताको गाथा कोरिएको ऐतिहासिक एवं पर्यटकीय गाउँ हो । जगदेखि छानोसम्म ढुङ्गा र काठबाट बनेका एकै स्वरुपमा जोडिएर रहेका एक हजार ३०० भन्दा बढी घर बारपाकको अर्को छुट्टै मौलिकता र चिनारी थियो ।
विक्रम संवत् २०७२ वैशाख १२ गते बिहान ११ बजेर ५६ मिनेटमा गएको ७ दशमलव ८ म्याग्नेच्युडको भूकम्पले पर्यटकीय सुन्दर गाउँ बारपाक क्षणभरमा तहसनहस बन्यो । गाउँका कुनै घर बाँकी रहेनन् ।
भूकम्पबाट बारपाक गाउँमा मात्रै ७२ जनाले ज्यान गुमाए । भूकम्प गएको आज १० वर्ष पूरा भएको छ । पुनःनिर्माण सकिएसँगै बारपाकवासीले भूकम्पको पीडा पनि भुल्दै गएका छन् ।
पुराना शैलीमा घर नबने पनि बारपाक गाउँमा आधुनिक शैलीका घर बनिसकेका छन् । अर्थात् भूकम्पपछिको पुनः निर्माण लगभग सकिएको छ । भूकम्पपछि बारपाकमा अहिले एक हजार ४५० भन्दा बढी घर पुनः निर्माण भइसकेका छन् ।
“परम्परागत शैलीका घर त बनाइएनन् तर आधुनिक शैलीका घर लगभग बनिसकेका छन्”, स्थानीयवासी सुशीला घलेले भन्नुभयो, “भूकम्पको एकै झड्काबाट ठूलो क्षति ब्यहोरेका बारपाकीले फेरि पुरानै शैलीको ढुङ्गैढुङ्गा र काठले बनेका परम्परागत मौलिकता बोकेका घर बनाउने आँट भने गर्न सकेनन् ।”
भूकम्पपछिको पुनःनिर्माणले बारपाकको स्वरुप र पहिचान बदलिदिएको छ । एउटा ठूलो सुन्दर गाउँ अहिले शहर जस्तै बनेको छ । “हामीलाई बारपाकको चिनारी दिने घर बनाएर बस्न मन नभएको होइन,” उहाँले भन्नुभयो, “तर सुरक्षित हुँदैन भन्ने अनूभूति बारपाकीले गरेपछि आधुनिक शैलीका घर बनाउनुको कुनै विकल्प रहेन ।”
बारपाकमा निजी आवास पुनः निर्माण लगभग सकिएको बारपाक सुलिकोट गाउँपालिका–१, बारपाकका वडाध्यक्ष घनबहादुर घले बताउनुभयो । “भूकम्पपछि यहाँका मौलिक चिनारी भने बचाउन सकिएन,” उहाँले भन्नुभयो, “बारपाक त बारपाक नै हो तर पुरानो मौलिक बारपाक होइन, अहिले नयाँ र आधुनिक बारपाक बन्यो ।”
पुराना मौलिकता बोकेका घर नबने पनि बारपाकको सुन्दरता भने हराएको छैन । मौलिक पहिचान बोकेको लाहुरेको गाउँ बारपाकलाई गोरखा भूकम्पपछि ‘इपिसेन्टर बारपाक’भनेर पनि चिनिने गरेको छ ।
यसले बारपाकलाई फरक चिनारी दिएको छ । दोस्रो विश्वयुद्धमा भिक्टोरिया क्रसको उपाधि प्राप्त गर्नुभएका गजे घलेको गाउँ भएकाले बारपाकको इतिहास गर्विलो छ । बुद्ध हिमालको काखमा अवस्थित बारपाकको कला, संस्कृति, परम्परागत रीतिरिवाज, वीरता र प्राकृतिक सौन्दर्यता विश्वसामु चिनाउन पहल गर्नुपर्नेमा स्थानीय जोड दिन्छन् ।
बारपाक केन्द्रविन्दु भएर गएको गोरखा भूकम्पबाट गोरखामा मात्र ४७१ जनाले ज्यान गुमाएका थिए । भूकम्पबाट गोरखासहित १४ जिल्ला अतिप्रभावित बने भने देशभरका ३१ जिल्लामा गोरखा भूकम्पले क्षति पुर्याएको थियो ।
पर्यटकीय गन्तव्य बन्दै
भूकम्पको इपिसेन्टर बारपाक अहिले पुनः निर्माण मात्र भएको छैन । बारपाक घुम्न आउने पर्यटकलाई लक्षित गरेर बारपाक गाउँभित्रै आकर्षक आन्तरिक पर्यटकीय गन्तव्य थपिँदै गएका छन् । गाउँपालिकाको पहलमा आन्तरिक तथा बाह्य पर्यटकलाई बारपाकतर्फ लोभ्याउन नयाँनयाँ घुम्न लायक गन्तव्यको विकास गर्न थालिएको गाउँपालिकाका अध्यक्ष विष्णुप्रसाद भट्टले जानकारी दिनुभयो ।
अब बारपाक घुम्न आउने पर्यटकले बारपाकभित्रै कलात्मक ‘बुद्ध पार्क’ पनि घुम्न पाउनेछन् । बारपाकस्थित ताक्लेनान डाँडामा करिब ४५ लाखको लागतमा निर्माण गरिएको ‘बुद्ध पार्क’ अहिले बारपाकमा पर्यटक भुलाउने प्रमुख गन्तव्य बन्दै गएको छ । उक्त उद्यानमा बारपाकको परम्परा, इतिहास, कला र संस्कृति झल्काइएको छ । बारपाकको सिङ्गगो दृश्य देख्न सकिने स्थानमा निर्माण गरिएको ‘बुद्ध पार्क’ मा करिब पाँच फिट अग्लो बुद्धको मूर्ति आकर्षक ढङ्गले राखिएको छ ।
त्यस्तै उद्यानमा बौद्ध धर्म, संस्कृति झल्कने खालका मानीलगायतका सामग्री पनि रहेका छन् । भूकम्पपछि सिङ्गो गाउँलाई एकै ठाउँबाट दृश्यावलोकनका लागि गाउँपालिकाले निर्माण गरेको ‘भ्यू टावर’ बारपाकको अर्को आकर्षक गन्तव्य हो । त्यस्तै भुकम्पमा ज्यान गुमाएको सम्झनामा निर्माण भइरहेको भूकम्प स्मृति उद्यानको काम लगभग अन्तिम चरणमा रहेको अध्यक्ष भट्टले जानकारी दिनुभयो ।
“सङ्घीय आयोजना कार्यान्वयन इकाइ पोखरामार्फत निर्माण भइरहेको स्मृति उद्यानको थोरै मात्र काम बाँकी छ,” उहाँले भन्नुभयो, “स्मृति उद्यानले बारपाकमा पर्यटकको आकर्षण अझै बढ्ने विश्वास छ ।” उद्यान निर्माण गर्न रु १५ करोड ५१ लाख ७५ हजारमा सम्झौता भएको छ ।
अध्यक्ष भट्टले बारपाक गाउँ अहिले पहाडको शहरका रुपमा स्थापित हुँदै गएको बताउनुभयो । “इपिसन्टेर हेर्न र घुम्नका लागि देश भित्रका मात्र होइन बाहिरबाट पनि थुप्रै पर्यटक बारपाक आउन थालेका छन्,” उहाँले भन्नुभयो, “भूकम्पले थलिएको बारपाक अब तङ्ग्रिसकेको छ ।”
गैह्रागाउँका दलित परिवार अझै अस्थायी टहरामा
जिल्लाभित्र भूकम्पले क्षति पुर्याएका अधिकांश निजी आवास, सरकारी तथा गैह्रसरकारी कार्यालय एवं पुरातात्विक भवन पुनःनिर्माणको काम सम्पन्न भइसकेको भए पनि इपिसेन्टर बारपाकको दलित बस्तीका केही भूकम्पपीडित भने अझै अस्थायी टहरामा छन् ।घर बनाउन जग्गा नपाउँदा भूकम्पको १० वर्षसम्म पनि दलित समुदाय अस्थायी टहरामा बस्न बाध्य भएको बारपाक सुलिकोट गाउँपालिका–१, की वडासदस्य लक्ष्मी विकले बताउनुभयो ।
“साबिकको बस्ती जोखिमयुक्त छ, त्यहाँ घर बनाएर बस्न मिल्ने अवस्था छैन”, उहाँले भन्नुभयो । गैह्रागाउँमा १५ दलित परिवारले घर बनाउन नपाएको विकको भनाइ छ । उनीहरु अहिले सरकारी जग्गामा अस्थायी टहरामा बस्दै आएका छन् ।
गोरखा । उत्तरी भेगमा अवस्थित बारपाक गाउँ प्राकृतिक सौन्दर्य, सांस्कृतिक विविधता र ऐतिहासिक महत्वले भरिपूर्ण ठाउँ हो । समुद्री सतहबाट करिब १ हजार ९ सय मिटर उचाइमा रहेको यो गाउँ विशेषतःघले र गुरुङ समुदायको मौलिक संस्कृति, अतिथिसत्कार र हिमाली दृश्यावलोकनका कारण परिचित छ । पछिल्लो समय आन्तरिक तथा बाह्य पर्यटकका लागि बारपाक आकर्षक गन्तव्यका रूपमा विकास हुँदै गएको छ ।
बारपाकको अर्को विशेषता यहाँको घले र गुरुङ संस्कृति हो । स्थानीय पोशाक, मौलिक खानपान र सांस्कृतिक जीवनशैलीले आकर्षित गर्छ । विभिन्न चाडपर्व तथा सांस्कृतिक कार्यक्रमले गाउँलाई अझ जीवन्त बनाउने गर्छ । विशेष गरी घाटु, सोरठी र मारुनी नाच यहाँको सांस्कृतिक पहिचानका रूपमा रहेका छन् । पाहुनालाई आत्मीयतापूर्वक स्वागत गर्ने यहाँका स्थानीयको व्यवहारले पर्यटकलाई आफ्नै घरजस्तो अनुभूति गराउँछ।
प्राकृतिक दृष्टिले पनि बारपाक अत्यन्त रमणीय छ । गाउँबाट मनास्लु, गणेश हिमाल, बुद्ध हिमाललगायत हिमशृंखलाको मनमोहक दृश्य अवलोकन गर्न सकिन्छ । बिहानको सुनौलो घामसँगै हिमालमा पर्ने उज्यालो दृश्यले पर्यटकलाई मोहित बनाउँछ । हरियाली डाँडा, स्वच्छ हावा र शान्त वातावरणले शहरको भीडभाडबाट टाढा केही समय बिताउन चाहनेका लागि बारपाक उपयुक्त गन्तव्य बनेको छ ।
पदयात्रा र ग्रामीण पर्यटनका हिसाबले पनि बारपाकको सम्भावना ठूलो छ । बारपाकबाट लाप्राक, गुप्सीपाखा हुँदै मनास्लु क्षेत्रसम्म पुग्न सकिने भएकाले ट्रेकिङ प्रेमीहरूका लागि यो मार्ग लोकप्रिय बन्दै गएको छ । गाउँमा होमस्टे सेवा विस्तार भएसँगै स्थानीयले पर्यटनबाट आम्दानी गर्न थालेका छन् । स्थानीय उत्पादन, हस्तकला र अर्गानिक खानाको प्रवर्द्धनले गाउँको आर्थिक गतिविधिमा समेत सकारात्मक प्रभाव परेको छ ।
प्राकृतिक सुन्दरता, ऐतिहासिक स्मृति, साहसी समुदाय र जीवित संस्कृतिको संगम बनेको बारपाक आज पुनर्निर्माण र सम्भावनाको प्रतीक बनेको छ । दुःख र विनाशबाट उठेर नयाँ पहिचान बनाउँदै गरेको यो गाउँले नेपाल ग्रामीण पर्यटनको उत्कृष्ट उदाहरण प्रस्तुत गरेको छ । बारपाक पुग्ने जो–कोहीले यहाँको शान्त वातावरण, संस्कृतिको मिठास र हिमाली सौन्दर्यलाई लामो समयसम्म सम्झिरहनेछन् ।
यद्यपि बारपाक अझै केही चुनौतीसँग जुधिरहेको छ । सडक पहुँच सहज भए पनि वर्षायाममा यात्रा कठिन बन्ने समस्या छ । स्वास्थ्य, शिक्षा र सञ्चारजस्ता आधारभूत सेवामा थप सुधार आवश्यक देखिन्छ । पर्यटनको सम्भावना उच्च भए पनि पर्याप्त प्रचारप्रसार र दीर्घकालीन योजना अभावले अपेक्षित लाभ लिन सकिएको छैन।
