काठमाडौँ । त्रिभुवन अन्तर्राष्ट्रिय विमानस्थलबाट ठुलो परिणाममा गाँजा बरामद गरिएको छ । विमानस्थलको आगमन भन्सार एरियाबाट अवैध लागुऔषध १० किलो १ सय ७० ग्राम गाँजासहित भारतीय नागरिक २५ वर्षीय अभिउदय पाहुनेलाई सोमबार दिउँसो प्रहरीले पक्राउ गरेको हो ।
थाई एयरवेजको उडानद्वारा बैङ्ककबाट काठमाडौँ आएका उनलाई जाँच गर्ने क्रममा उनको सुटकेसबाट उक्त वस्तु फेला परेको प्रहरीले जानकारी दिएको छ । उनलाई आवश्यक अनुसन्धानको लागि लागुऔषध नियन्त्रण ब्युरो पठाइएको छ ।
उता कैलालीको धनगढी उपमहानगरपालिका-१ पशुपति टोलबाट अवैध लागुऔषध खैरो हेरोइन करिब १२ ग्राम २ सय ५० मिलिग्राम सहित २ जनालाई मंगलबार दिउँसो प्रहरीले पक्राउ गरेको छ । पक्राउ पर्नेहरूमा सोही महानगरपालिका-१ बस्ने भारत उत्तर प्रदेश घर भएका ४१ वर्षीय पप्पु खान र २९ वर्षीय मुजमिल्ल अन्सारी रहेका छन् ।
वडा प्रहरी कार्यालय धनगढी र लागुऔषध नियन्त्रण ब्युरो शाखा कार्यालय धनगढीबाट खटिएको प्रहरीले उनीहरूलाई उक्त लागुऔषध सहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।
