इंग्लिस क्लब चेल्सीले फिफा क्लब विश्वकपको उपाधि जितेको छ । आइतबार राति सम्पन्न फाइनलमा युरोपेली च्याम्पियन पेरिस सेन्ट जर्मेन (पीएसजी)लाई ३-० ले हराउँदै चेल्सी च्याम्पियन बनेको हो ।
अमेरिकाको न्यूयोर्कस्थित मेटलाइफ स्टेडियममा चेल्सीलाई उपाधि जिताउन ल पाल्मरले २ तथा जोआओ पेड्रोले १ गोल गरे । चेल्सीले पहिलो हाफमा नै ३-० को अग्रता लिएको थियो । रक्षात्मक रणनीतिमा उत्रिएको चेल्सीले तीनै गोल काउन्टर अट्याकमा गरेको थियो । पाल्मरले २२ औं मिनेटमा चेल्सीलाई अघि बढाएका थिए । ३० औं मिनेटमा पाल्मरले दोस्रो गोल गर्दै चेल्सीलाई बलियो स्थितिमा पुर्याए ।
४३औं मिनेटमा पेड्रोले गोल गर्दै चेल्सीलाई ३-० ले अघि बढाए । प्रतियोगिता अवधिभर उत्कृष्ट प्रदर्शन गरेको पीएसजी फाइनलमा भने चल्न सकेन । दोस्रो हाफको ८५ औं मिनेटमा पीएसजी १० खेलाडीमा सिमित भएको थियो । जोआओ नेभेसले मार्क कुकुरेलाको कपाल तानेपछि रेफ्रीले भीएआरको सहायता लिँदै रातो कार्ड दिएका थिए ।
