४ मंसिर २०८३, शुक्रबार Friday, 20 November 2026
हामीलाई पछ्याउनुहोस्
४ मंसिर २०८३, शुक्रबार 4:46 pm
Banner

सञ्चार उद्यमी हेमराज धितालका हत्यारालाई कारबाहीको माग गर्दै गृहमन्त्रीको ध्यानाकर्षण

सूचना प्रेस २०८२ श्रावण ३ शनिबार ००:००, १५:०१ बजे १ मिनेट पढाइ

काठमाडौँ । दाङका सञ्चार उद्यमी देवीप्रसाद धिताल ‘हेमराज’ का हत्यारालाई कारबाही गर्न माग गर्दै गृहमन्त्री रमेश लेखकको ध्यानाकर्षण गराइएको छ। हेमराजका भाइ पुष्कर धितालको तर्फबाट रेडियो तुलसीपुरका स्टेसन प्रमुख अर्जुन गरी र प्रेस चौतारीका केन्द्रीय सदस्य तथा लुम्बिनी प्रदेश सह इन्चार्ज गणेश आचार्यले आज गृहमन्त्री लेखकलाई ध्यानाकर्षण पत्र बुझाएका हुन्।

२०६७ साल साउन ६ गते अपराह्न तुलसीपुर–१२, जसपुरमा अज्ञात समूहले गोली हानी हत्या गरेका हेमराज रेडियो तुलसीपुरका अध्यक्षसमेत थिए। ध्यानाकर्षण पत्र बुझ्दै गृहमन्त्री लेखकले अपराधीलाई कारबाही गर्नु राज्यको कर्तव्य भएको बताउँदै सञ्चार उद्यमी हेमराजका हत्याराको पहिचान गरी कारबाही गर्न प्रहरीलाई निर्देशन दिने प्रतिबद्धता जनाए।

‘१५ वर्षसम्म पनि सञ्चार उद्यमीका हत्यारा पत्ता नलाग्नु दुःखद हो,’ गृहमन्त्रीले भने, ‘ढुक्क हुनुस्, घटनालाई गम्भीर रूपमा लिएर तत्काल अनुसन्धान गरी कारबाही गर्न म आईजीपीलाई निर्देशन दिन्छु।’ घटनाको अनुसन्धान हाल प्रहरीको केन्द्रीय अनुसन्धान ब्युरो (सीआईबी) ले गरिरहेको भए पनि हालसम्म कुनै ठोस उपलब्धि नआएको मृतक हेमराजका भाइ पुष्कर धितालको गुनासो छ। उनका अनुसार प्रहरी अझैसम्म हत्याराको स्केचसमेत बनाउन सफल भएको छैन।