काठमाडौं । भौतिक पूर्वाधार तथा यातायातमन्त्री कुलमान घिसिङले चाडबाडलक्षित यातायात व्यवस्थापन सहज बनाउन र सडक सुरक्षाका विषयमा शनिबार (असोज ४) सरोकारवालासँग छलफल गरेका छन् ।
छलफलपछि मन्त्री घिसिङले चौबिसै घण्टा यात्रुलाई सडक अवस्थाबारे जानकारी दिन र गुनासो सुन्न तथा त्यसको व्यवस्थापनका निम्ति निर्देशन दिए । बाढीपहिरोले अवरुद्ध सडक तत्काल सञ्चालनमा ल्याउन पनि उनले निर्देशन दिएका छन् ।
बैठकमा सार्वजनिक सवारीसाधन नागढुंगा–सिस्नेखोला सुरुङमार्गबाट बाहिर जाने व्यवस्था मिलाउने विषयमा छलफल गरिएको थियो । दसैँपछि त्यस्ता सवारीसाधनले प्रवेश समेत गर्न पाउने व्यवस्था मिलाउन छलफल गरिएको घिसिङको सचिवालयले जनाएको छ ।
काठमाडौं उपत्यकाको नयाँ बसपार्क तथा मुलुकका विभिन्न राजमार्गमा सुरक्षा व्यवस्था चुस्तदुरुस्त बनाउन प्रहरी गस्ती तथा प्रहरी संख्या थप गराउन नेपाल प्रहरीलाई निर्देशन दिन गृह मन्त्रालयलाई अनुरोध गर्ने निर्णय बैठकबाट गरिएको छ ।
राजमार्गको कमजोर अवस्था तथा यात्रुवाहक सवारीसाधनको आवागमनलाई प्राथमिकता दिनुपर्ने भएकाले बुटवल–नारायणगढ सडकको दाउन्नेखण्डमा दसैँ अवधिभर लागु हुने गरी ठूला भारवहन सवारीसाधन (१२ चक्के र सोभन्दा माथि) सञ्चालन नगर्न/नगराउन अनुरोध गर्ने निर्णय गरिएको छ । उक्त सडकखण्डबाट खाद्यान्नलगायत अत्यावश्यक सामग्री ढुवानी गर्ने सवारीसाधनलाई भने निरन्तर आवागमनको व्यवस्था मिलाउन भनिएको छ ।
मुलुकभरका मुख्य सडकलाई चुस्तदुरुस्त राख्न, सुधार गर्न/गराउन, पहिरोजन्य विपद्को व्यवस्थापनका निम्ति आवश्यक सामग्री तथा यन्त्रको व्यवस्थापन गर्न, बुटवल–नारायणगढ सडकको दाउनेखण्डमा २४सै घण्टा दुईतर्फी यातायात सञ्चालन गर्न, नारायणगढ–मुग्लिन सडकखण्डको तुइन खोलामा भएको अवरोध (पहिरो) हटाई तत्काल यातायात सञ्चालनमा ल्याउन र तातोपानी नाकालाई जोड्ने मुख्य सडक दसैँअगाडि सञ्चालनमा ल्याउने गरी आवश्यक कार्य गर्न/गराउन बैठकबाट सडक विभागलाई निर्देशन दिइएको छ ।
आमनागरिकलाई मौसम र सडकको अवस्था बुझेर मात्र यात्रा गर्न हुन अनुरोध गर्दै सार्वजनिक सूचना जारी गर्ने निर्णय समेत गरिएको छ । मुलुकभरिको सडकको अवस्था र सुरक्षालाई व्यवस्थित गर्न २४ घण्टा नै सञ्चालन हुने गरी ‘फोकल पर्सन’ समेतको व्यवस्थापन गर्न/गराउन सडक विभागलाई निर्देशन दिइएको छ ।
बैठकमा भौतिक पूर्वाधार तथा यातायात मन्त्रालयका सचिव, यातायात व्यवस्था विभागका महानिर्देशक, सडक विभागका महानिर्देशक, नेपाल प्रहरी, नेपाल यातायात व्यवसायी राष्ट्रिय महासंघका पदाधिकारीको उपस्थिति थियो । रासस
