नेपालगन्ज। बाँकेको कोहलपुर र नेपालगन्जमा रहेका तीन सरकारी कार्यालय पूर्ण रूपमा जोखिमयुक्त रहेको पाइएको छ । प्राविधिक अध्ययनपछि सहरी विकास तथा भवन कार्यालयले ती कार्यालयबाट पुनः सेवा प्रवाह गर्न नसकिने निष्कर्षसहित अन्य स्थान प्रयोग गर्न सुझाव दिँदै रेड जोनमा राखेको छ । ‘जेनजी’ प्रदर्शनका क्रममा कोहलपुरमा रहेको एउटा कार्यालय र नेपालगन्जमा रहेका दुई कार्यालयलाई ‘रेड जोनमा’ राखिएको कार्यालय प्रमुख श्रीराम आश्रय शाहले जानकारी दिए ।
उनले बाँके र बर्दियाका प्रदेश संरचनामा कुनै क्षति नभएको र सङ्घीय कार्यालयमध्ये आन्तरिक राजस्व कार्यालय, भूमिसुधार तथा मालपोत कार्यालयको भवनमा क्षति भएकाले प्रवेश निषेध गरिएको बताए । ‘रेड जोन’ मा रहेका ती कार्यालयबाट सेवा प्रवाह गर्न सम्भव नभएकाले वैकल्पिक रूपमा सेवा प्रवाह गर्न सुझाव दिएको जानकारी दिँदै शाहले दुई कार्यालय पूर्ण रूपमा जोखिममुक्त रहेको र सात वटा कार्यालयलाई ‘एलो जोन’मा राख्दै केही समयपछि आवश्यक मर्मतपछि प्रयोग गर्न सकिने उल्लेख गरे ।
“पहेँलो स्टिकर प्रदान गरिएका कार्यालयबाट मर्मतसम्हार र सरसफाइ गरेर सेवा प्रवाह गर्न सकिने अवस्था छ । यस्तै, ग्रिन स्टिकर पाएका कार्यालयले सामान्य मर्मतपछि पनि कार्यालय सञ्चालनमा ल्याउन सक्ने अवस्था छ”, उनले भने ।
शुक्रबार र शनिबार दुई दिनसम्म अध्ययन गरिएको थियो । टोलीले जिल्लाभित्रका सम्पूर्ण भौतिक संरचनाको जाँच गरी ‘ग्रेडिङ’ गरेको छ । जिल्लाका करिब १२ कार्यालयमा भएको आगजनीले क्षति पुर्याएको छ ।
नेपाल इन्जिनियरिङ एसोसिएसन, सहरी तथा भवन डिभिजन कार्यालय, सहरी विकास तथा भवन कार्यालय, नेपालगन्जको संयुक्त टोलीले ती सरकारी कार्यालयको अध्ययन गरेको हो ।
