काठमाडौं : नेपाल कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले नयाँ राजनीतिक दलहरूलाई ‘क्षणिक हावाहुरी’ को संज्ञा दिँदै उनीहरूको आयु छिट्टै सकिने टिप्पणी गरेका छन् ।
शनिबार काठमाडौंमा आयोजित दोलखा–काठमाडौं सम्पर्क निर्वाचन परिचालन कमिटीको चुनावी सन्देश सभालाई सम्बोधन गर्दै प्रचण्डले राष्ट्रिय स्वतन्त्र पार्टी लगायतका नयाँ दलहरूसँग मुलुक हाँक्ने ठोस सिद्धान्त र सांगठनिक आधार नभएको दाबी गरे।
निर्वाचनको संघारमा नयाँ दलहरूले पाएको आकर्षणलाई सामान्य मौसमी प्रभावको रूपमा टिप्पणी गर्दै उनले भने, ‘हावाहुरी केही दिन आएजस्तो देखिए पनि त्यो सधैँ चल्दैन। मानिसहरूले बुझिसकेका छन् कि देशलाई वैचारिक र सैद्धान्तिक नेतृत्व दिन सक्ने शक्ति कुन हो। आवेगको भरमा आएको लहरले मुलुकको जटिल राजनीतिलाई निकास दिन सक्दैन।’
प्रचण्डले नयाँ दलहरूले बाँडेको सपनालाई ‘भ्रमको खेती’ भन्दै जनता पुनः आफ्नै पार्टीको एजेन्डा र संगठनमा फर्किएको जिकिर गरे । साथै, इतिहासमा नेपाली जनक्रान्तिद्वारा फ्याँकिएका शक्तिहरूले निर्वाचन बिथोल्न चलखेल गरेको आरोप पनि लगाए । उनले देशमा दुई प्रकारका प्रवृत्ति सक्रिय रहेको बताए- एकातर्फ शान्तिपूर्ण आन्दोलन गर्नेहरूलाई निशाना बनाउने र अर्कातर्फ विध्वंसकारी गतिविधि गर्ने शक्ति। यी प्रवृत्तिविरुद्ध आफ्नो पार्टी खडा रहेको प्रचण्डको भनाइ थियो ।
