होर्मुजमा अड्किएका जहाजलाई सुरक्षित बाहिर निकाल्ने ट्रम्पको घोषणा

अमेरिकी राष्ट्रपति डोनाल्ड ट्रम्पले स्ट्रेट अफ होर्मुजमा अड्किएका जहाजलाई सुरक्षित रूपमा बाहिर निकाल्न अमेरिका अघि बढ्ने घोषणा गरेका छन् । उनले सोमबारदेखि सुरु हुने ‘प्रोजेक्ट फ्रिडम’ अन्तर्गत अमेरिका जहाजहरूलाई मार्गदर्शन गर्ने बताएका हुन् । यो कदम अमेरिका, इरान र मध्यपूर्वका देशहरूको हितका लागि मानवीय पहलका लागि हुने उनको भनाइ छ । उनले उक्त प्रक्रियामा अवरोध भए कडा कारबाही गरिने चेतावनी पनि दिएका छन् ।

२८ फेब्रुअरीदेखि सुरु भएको युद्धपछि होर्मुजहुँदै हुने जहाज आवागमनमा इरानले प्रतिबन्ध लगाएको छ भने अमेरिकाले इरानी बन्दरगाहहरूमा नौसैनिक नाकाबन्दी गरेको छ । यसका कारण करिब २० हजार जहाज खाडी क्षेत्रमा फसेका छन् ।

अमेरिकी सेनाले १५ हजार सैनिक, मिसाइल सुसज्जित युद्धपोत र १०० भन्दा बढी विमान परिचालन गरिने जनाएको छ । विश्वको करिब २० प्रतिशत तेल र ग्यास यही मार्गबाट ओसारपसार हुने भएकाले द्वन्द्वले ऊर्जा मूल्यमा ठूलो प्रभाव पारेको छ ।

यसैबीच, अमेरिका र इरानबीच सकारात्मक वार्ता भइरहेको ट्रम्पले बताएका छन् । इरानले पठाएको नयाँ शान्ति प्रस्तावको समीक्षा भइरहेको बताइएको छ, तर अमेरिकाले औपचारिक प्रतिक्रिया भने पुष्टि गरेको छैन ।